「金牌莊家」詹培忠上年6月入主北京時裝（761），唔夠一個月佢就自爆頸部有腫瘤，唔知金勞詹係咪要醫病，所以北京時裝喺易手後約3個月，先有首個大型投資項目推出，收購一間印尼開採業務嘅公司。再事隔3個月，到噚日，北京時裝先有新動作，今次係換董事。
新加入嘅董事之中，最令華華感興趣嘅，係許雄被委任做獨立非執董。許雄係已退休嘅區域市政總署前署長，之後做過新巴高層同埋新創建（659）董事等，不過，估唔到原來許雄同金勞詹咁熟，應邀做北京時裝董事。
不過，華華知道許雄同特首曾蔭權係老友記，舊年煲呔曾競選特首，就係由許雄做競選辦秘書長，呢個月初，煲呔曾帶太座遠道入愉景灣，幫新生精神康復會社會企業開幕禮做嘉賓，而呢個會嘅副主席就係許雄。