恒指呢個禮拜最多曾跌超過3000點，大把水嘅內地富豪就一於有危先有機。玖龍紙業（2689）主席張茵、上海復地（2337）郭廣昌、富力地產（2777）張力，同世茂房地產（813）許榮茂，都喺呢輪跌市中，真金白銀買番自己公司股票，力撐股價。
世茂主席許榮茂最落力，喺21號狂吸500萬股世茂，不過，許主席咁大手掃貨都冇乜用，世茂股價依然冇乜起色，噚日收報15蚊，增持以嚟股價跌5.6%，賬面蝕咗200幾萬銀。
相反，富力地產副董事長張力就有眼光得多，佢喺今個禮拜一同二，兩次增持富力，金額唔多，只係用咗147.9萬銀，買入7萬股富力，噚日富力收21.45蚊，3日嚟股價微升1.2%，賬面獲利廿幾萬。
至於復地董事長郭廣昌亦花千萬，增持公司股權，佢喺星期一用咗1149萬銀，掃300萬股，公司股價4日嚟跌咗2.1%，賬面冇咗近廿萬。講到最慘，要數張茵，一而再增持玖紙，可惜玖紙繼續跌，噚日玖紙收12.1蚊，再跌5.5%。
據07《世界企業家》「中國500富豪榜中榜」，張茵排第二，許榮茂排第三，張力同郭廣昌分別排第七同第八。
內地富豪本周增持情況
張力
股份：富力地產（2777） 增持股數（股）：7萬
涉及金額（元）：147.9萬
許榮茂
股份：世茂房地產（813） 增持股數（股）：500萬
涉及金額（元）：7706萬
郭廣昌
股份：上海復地（2337） 增持股數（股）：300萬
涉及金額（元）：1149萬
張茵
股份：玖龍紙業（2689） 增持股數（股）：248.8萬
涉及金額（元）：3125.2萬
資料來源：港交所網頁
電郵：mailto:[email protected]
