電影《六樓后座》中，講述一班青年沉迷玩TruthorDare的遊戲，該片監製鄭丹瑞（阿旦）實情是真正玩家。選擇Truth，3年前舊作《阿嫂》票房仆直，輸到杰撻撻，他認醜，向導演黃精甫道歉；選擇Dare，在影壇屢敗屢戰，開拍《六》片續集。知恥近乎勇，阿旦這個小男人誓要重拾失地！
鄭丹瑞03年監製電影《六樓后座》，請來林嘉欣和盧巧音等主演，成功刀仔鋸大樹，故剛完成《小男人》舞台劇的阿旦將再接再厲，再度監製續集《六樓后座2家屬謝禮》，但卡士人面全非，主角是組合農夫和江若琳等。
自認失敗買教訓
過去幾年阿旦監製過不少電影，最風光是《見鬼》，最淒慘是《阿嫂》，但他坦然，不怕重挖《阿嫂》瘡疤：「電影有成功有失敗，《阿嫂》喺劇情、同埋我控制唔住拍攝節奏，我作為監製，我錯！我可能同導演唔夠夾，所以失敗，對我係好教訓；但《見鬼》令李心潔做影后，呢部戲我跟得好足，有好完整嘅劇本，我好信任導演（彭氏兄弟）拍到呢個效果。」
阿旦姓鄭不姓賴，願意扛起責任：「當初係我唔識得操控黃精甫，唔識利用佢玩影像而畀一個好嘅古仔佢，我太信任佢，畀晒成個古仔佢諗。公道一句，只要佢開到竅係無可限量！我好希望再同佢合作，畀機會我做多啲嘢啦，上次做得唔夠多，對唔住！我向黃精甫道歉。」
嘆初入行唔識撈
阿旦又說：「好多年前我寫過一部電影《籠裡雞》，票房差到阿媽都唔認得，但嗰時新，喺麗的做編劇，不知天高地厚，有人搵你寫電影劇本梗係好巴閉，𠵱家諗番梗係抵死啦，嗰時我可以原諒自己，《阿嫂》我要負責，因為我喺呢行咁耐，竟然輸鋪咁杰撻撻，對我嚟講幾醜。」
採訪：朱倬誼 攝影：葉君海
服裝、場地：BrooksBrothers
