湯盈盈日前喺灣仔遭金毛男掌摑臉部，涉案被告陳文俊前日喺東區法院提堂，佢被控一項普通襲擊及一項襲擊造成身體傷害罪，但被告否認控罪，案件排期至4月24日開審。噚日湯盈盈照常返到將軍澳電視廣播城排舞，佢知道消息後話：「有關事件都交畀警方處理。」
「當係人生經歷」
盈盈好友曾志偉喺01年7月去夜店消遣時遭伏擊，傷及面部同頭部，事後需要縫29針，呢兩位同是天涯淪落人，下月農曆新年齊齊去美加登台，演出《超級無敵2008掌門人狂歡賀歲SHOW》，大前日仲一齊去咗中環美國領事館攞工作簽證，其間發現志偉同盈盈不停咬耳仔，雞啄唔斷。
究竟志偉同盈盈傾啲乜？佢有冇教盈盈幾招防襲心得，志偉噚日話：「我開解佢，叫佢唔好介懷，件事都發生咗，其實坊間每日都有好多同類事件發生，咁啱件事發生喺藝人身上，我叫佢當呢件事係人生一個經歷。藝人出街好易俾人認出，所以凡事要低調同檢點啲。」
