有「魔僧」之稱嘅LeoGoodstadt（顧汝德）喺二○○五年出版咗一本UneasyPartners:TheConflictbetweenPublicInterestandPrivateProfitinHongKong，大概好好賣，已經重印。二○○七年，顧汝德又出版一本新書，叫做Profits,PoliticsandPanics:HongKong'sBanksandtheMakingofaMiracleEconomy,1935-1985。為咗呢本新書，顧汝德特別到FCC午餐會演講。呢本書就係香港金融史，顧汝德演講時指出，殖民地政府素來唔鍾意規管銀行，直至一九三八年發生銀行風潮，先至開始叫做監管吓，但戰後財政司郭伯偉乜都唔鍾意管，由得本地銀行自生自滅，一於眯埋眼唔理，卒之一九六五年發生銀行大擠提，先至認真處理，接郭伯偉手嘅夏鼎基又係萬事不管，等到八十年代發生佳寧風暴，恒隆銀行、永安銀行、海外信託銀行相繼由政府接管，先至在一九八五年痛定思痛，大事修訂銀行條例，之後二十三年至今，雖然經歷咗九七、九八年嘅亞洲金融風暴，香港銀行系統十分穩健，安然無事，能擔當世界金融中心地位。
顧汝德對郭伯偉、夏鼎基有嚴厲批評，直情話佢哋對銀行監管ignorant（無知）。佢咁講法，左丁山立即舉頭周圍望，睇吓《壹週刊》楊社長喺唔喺度先！你知啦，楊社長視郭伯偉、夏鼎基為一生偶像，如果在場聽顧汝德演講嘅話，一定會同佢擦出火花。
講香港銀行史，不能避免談及滙豐，顧汝德話滙豐高層全部係蘇格蘭人，但在香港經營多年，從來不愛國（英國），辦事以利潤為先，不以英國利益為重，例如冷戰時期，滙豐最懂得與中國打交道、做生意。滙豐大班桑達士與沈弼別具慧眼，老早分別識得全力支持包玉剛與李嘉誠，不惜與英資行翻面，例如支持包玉剛敵意搶購九龍倉，與同係蘇格蘭人鬧交（指渣甸），又將和黃賣畀李嘉誠，唔賣畀英資。至於桑達士與沈弼點解咁有眼光呢？顧汝德冇完整答案，恐怕會成為歷史懸案咯。