上期果然一隊阿仙奴都夠開「大」，全靠路斯基尾段鏟射贏富咸3:0，令〈早飛王〉命中率繼續高企。今個禮拜英足盃第4圈當道，揀場星期日嘅波畀大家玩吓，要曼城作客贏英冠嘅錫菲聯，90分鐘搞掂對手唔使重賽。畢傑
錫菲聯近期相當不濟，上場喺設菲爾德打吡戰作客淨輸0:2畀同市球隊錫周三，信心受到打擊。賽後主席麥卡比出嚟話唔緊要，叫班球員繼續爭升班喎；講真連佢老人家出得嚟講嘢，證明好唔滿意隊波表現啫。
睇番錫菲聯呢排攻力薄弱，對上10戰有6場入唔到波，首席射手比亞堤係就係周中傷癒復操，但係呢位前英超射手話自己唔敢搏唔急於復出，費事又整親個膝頭，寧願「弗」番晒先喺聯賽披甲。再睇錫菲聯仲係靠班年紀唔細嘅球員孭飛，好似基利士比、軒祖咁，全部3張或以上；前排又借咗保頓38歲嘅史必，又賣走中場主力阿倫昆尼去葉士域治，真係唔知班波想點。
曼城盃賽例遣強陣
曼城最近雖然斟拜仁慕尼黑前鋒普多斯基觸礁，日前仲借走埋路蘭度比安基去意甲拉素，我覺得呢位意大利射手射門觸覺好強，但係衰在有思鄉病，其實佢暫時離隊對曼城或者係好事，我冇擔心過球隊攻力問題。
仲有呀，曼城不嬲都鍾意喺盃賽遣強陣，之前英聯盃同英足盃都會出米卡李察士、艾蘭奴、馬田柏杜夫同夏文等主力搏殺，相信今次作客錫菲聯仍然唔會揸流攤。所以就算續有伊美梅賓沙、米高莊遜同卡斯廸路養傷，我仍然認為夠贏對手。
錫菲聯仲係靠老將，中場活力一般，前線嘅侯斯今季仲未開過齋；加上錫菲聯日前第3次向英足總上訴（之前兩次俱敗訴），要求再度審判韋斯咸因違規派出泰維斯及馬斯真蘭奴，而導致佢哋上季降落英冠嘅賠償。錫菲聯近期咁多嘢煩，梗係揀有近7,000個球迷會入場支持嘅曼城，晉級英足盃第5圈啦！客W有1.95倍夠晒分頭。
早飛王貼士
星期日17
錫菲聯vs曼城
首選：曼城勝（1.95）
次選：錫菲聯[半和]（2.1）
冷選：曼城勝2:0（7）
周末早飛超級重心
布力般訪維拉可不敗
《英超》星期六3
阿士東維拉vs布力般流浪2:2（13倍）
阿士東維拉仍有巴利養傷，應未可趕及周六上陣，而近期防線相當不濟，已連續10場賽事失球，當中更失掉18球之多，要讓波始終有風險。布力般流浪續缺中場杜基及彼德，但前線入球能力強，料可保不敗離場。
普雷斯頓受讓筍
《英足盃》星期六7
打比郡vs普雷斯頓1:2（11倍）
打比郡已連續19場賽事未嘗在法定時間內擊敗對手，而麥伊夫尼、利確、拜獲特及皮雅臣續因傷缺陣，就算或有大衛鍾斯復出料仍難讓對手。普雷斯頓剛由蘇超鴨巴甸簽得守將米高赫特加盟，有望加強守力，受讓筍。
彼德堡主W扒冷
《英足盃》星期六10
彼德堡vs西布朗2:1（12倍）
彼德堡今季曾在英聯盃及英足盃，先後淘汰過兩支英冠隊修咸頓及高車士打晉級，賽前所有賽事計射入23球的前鋒麥連稱，彼德堡擁英冠水準，主W扒冷佳品。西布朗射手菲臘斯已復操，但上陣成疑，宜留意防線近5仗失9球。