加運動感，再加幾分跑味，係唔少車種換新Look嘅指定動作，今次寶馬630CiACoupe08新版登場，一樣主打運動感。雖然外觀上只稍作改動，不過最有心思係頭尾指揮燈用上好似由大量晶鑽組成嘅LED燈，營造出閃爍效果，夠晒搶！再加點馬力、換埋波箱，反應更加敏捷。新一年，梗係要醒目啲！
記者：黎頌詩
攝影：陳盛臣
Model：Erica
賣相 惡幾分
寶馬6系一向賣高級豪跑格局，不過風格不屬斯文靚仔，車身線條流線，但就唔玩矯捷靈活Feel，反而強調力量同肌肉感，畀人另類公子哥兒感覺。今次以小改款登場，豪邁風格又再升級。除咗車身兩邊嘅側裙，令線條顯得更富立體感外，車頭同車尾嘅造型，係主要轉Look着墨點。最搶眼嘅莫過於閃爍過人嘅頭尾燈，雖然形狀跟前作分別不大，但細看就發現，兩列由多組小燈組成嘅橫列式LED指揮燈置於Bi-Xenon頭燈之上，像兩道橫眉，配合原本已經兇兇哋嘅頭燈造型，直頭似眼囗囗，唔單止相當搶眼，亦令賣相即時惡了幾分。而兩盞霧燈向車嘅兩邊稍為移開，氣壩面積相應增大，線條亦變得更為硬朗，係另一增加霸氣嘅絕招。睇埋車尾，LED尾燈同頭燈設計相呼應，一樣夠閃。尾冚同擾流板造型亦稍作改動，令整個車尾睇起嚟顯得層層叠叠，造型工整而又不失特色。
內櫳 精品Feel
既然標榜係優皮跑車，豪華感絕對唔少得，呢點突顯喺內櫳鋪排同設備上。源於7系嘅i-Drive多媒體系統，以及各式電子配備擺明着重駕駛享受。而車廂內部全以黑色真皮粉飾，中控台配上黑色桃木。銀黑相襯、強調跑味嘅三幅式軚環，亦設有遙控音響及免提電話按鈕。整體上，豪華感比跑味明顯嚟得強烈。新版亦喺豪華感方面再落功夫，一個銀色外置式杯座就充滿精品味道，新嘅加減波撥片亦設計得相當精細，銀邊配真皮，夠晒品味。另外，P波置於頂端嘅新式波棍，亦喺630CiA中登場。如果作為駕駛者同前座乘客，呢部四座雙門大型跑車嘅舒適度，可以話滿分，座椅闊落，更有自動式頭枕同司機位記憶功能。不過一移到後排，印象即時大打折扣，雖然Keep住豪華感，但由於後排座椅與前排一樣左右分隔，而且落腳空間較窄，上落稍嫌不便。想做最嘆嗰個？唔使講，梗係爭住做司機啦！
性能 稍提升
話明係小改版，08630CiA性能亦稍為增強。雖然沿用嘅依然係舊有嘅3.0引擎，不過呢部由鋁合金製造、全球最輕量化的直列六缸引擎經調校後，馬力由258匹提升至272匹，而扭力亦由300Nm提升至315Nm，雖然喺數值上只有稍微差異，不過起跑同加速表現無疑都更有力量，由0至100公里加速都只係6.4秒。新版630CiA亦同時轉用新一代嘅Steptronic自動波箱，轉檔反應同流暢感亦有提升。軚環上仲加上咗加減波撥片，要享受手波嘅樂趣，比以前更得心應手。雖然車重1,615kg，車身亦較大，但走彎時表現仍不俗，穩定性強卻依然感覺輕盈，唔會出現笨拙感。開住呢部新版6系，享受住各種高科技帶嚟嘅駕駛樂趣同氣派，感覺……好Yuppie。
08版BMW630CiACoupe規格
引擎：2,996c.c.直6
馬力：272ps/6,650rpm
扭力：315Nm/2,750rpm
傳動：6前速Steptronic+/-波箱，後輪驅動
尺碼：4,820×1,855×1,374mm
查詢：BMWHK（25776168）