以性感掛帥的女子組「Freeze」自出道以來是非不斷，禍從口出，繼早前於雜誌上發炮狂寸鄧麗欣、何韻詩和官恩娜等歌手後，近日更連湯盈盈也不放過，暗示她可能「得罪人」才被掌摑。前晚她們出席《蘋果》網站直播節目《娛樂開CHAT》時，解釋這兩件「禍事」，表示純粹一場誤會，並會「經一事長一智」，以後會小心謹慎自己的言行。
Freeze於節目中除了大談三人的相處之道和擇偶條件，還選了11歲網友Olive為整晚表現最好的觀眾，獲得她們親筆簽名的CD一隻。適逢當日是主持王友良生日，工作人員更特意準備蛋糕為他慶祝，Freeze更於節目中唱歌和獻吻賀壽，大家可登入《蘋果》網站 http://ent.appledaily.com隨時重溫節目。
採訪：林惠卿 攝影：陳順禎
為工作有爭拗 何文田Olive
Olive：你哋𠵱家住埋一齊，咁有冇試過意見不合？
陳樂榣：當然有啦！不過我哋住方面好少有意見不合，通常意見不合都係關於工作。因為大家都會好着緊，變咗一急起上來大家就會好各持己見。
甄穎珊：Olive你聽過我哋嘅歌，你最鍾意我哋邊首歌呀？
Olive：我最鍾意《金睛火眼》。
誤會跟蹤呵氣 觀塘勞倫斯
勞倫斯：我想問陳樂榣，你睇完本雜誌話你俾變態fans嚇親喎，到底係咪呢？
陳樂榣：係咪有你份嗰期啊？都有少少嚇親。
勞倫斯：我都唔知發生乜嘢事，我無啦啦變咗變態鹹濕佬。
陳樂榣：篇報道其實講勞倫斯喺我後面跟住我，又話佢變態，喺我後面吹風，其實勞倫斯只係我fans，呢個都只係一個誤會，我唔會太介意，亦希望你唔好太介意啦！
識煮心形肉餅 何文田David
David：三位靚女你哋好，你哋近來好多是是非非，有冇諗過趁新年去廟宇拜吓神呢？
陳樂榣：我哋會去祈吓福，又唔會話特登去打小人或者整走啲是非。
主持：始終娛樂圈係一個是非圈，只係希望可以減少傷害性啫。
David：你哋講自己鍾意煮嘢食，你哋三個當中邊個煮嘢食比較「色香味」，邊個煮得最差呀？
甄穎珊：味道就應該係陳樂榣會好啲，因為佢真係有學咗兩年廚，但外表可能我會好啲，我試過整心形肉餅畀爹哋食。
石詠莉：我學咗唔多，但煮來煮去都係嗰幾味，可能我係最差嗰個。
無心影射盈盈 馬鞍山李嘉誠
馬鞍山李嘉誠：其實你哋出道咁耐，負面新聞就有咁耐，例如有雜誌幫你哋做咗咁多新聞，最近又有湯盈盈單嘢，你哋會有乜嘢方法改善負面新聞呢？
甄穎珊：其實湯盈盈呢單嘢就真係一個誤會，因為個記者當時問我哋都問得好模糊，我哋嗰日都好忙，完全唔知道有呢件事發生，記者略略地提過「湯盈盈俾人打，咁你哋驚唔驚出到街會俾人打？」問咗我哋一個咁嘅問題，而我哋嗰刻就以自己心態答「唔會，唔得罪人都唔會俾人打嘅。」其實嗰刻係完全冇諗過會影射到人哋。
陳樂榣：但經過呢件事後，我哋都會加倍再小心，講嘢會謹慎小小。
官恩娜下周等你Chat
《娛樂開Chat》第三集將請來性感女星官恩娜擔任嘉賓，若讀者想一睹她的真我個性，請於1月30日（下周三）6:00pm登入 http://ent.appledaily.com即可，節目將於當晚7:00pm在《蘋果網站》直播。
