陳穎妍和老友陳霽平同樣喜歡小動物，二人日前在銅鑼灣行孖咇逛寵物店，陳穎妍準備為家中貴婦愛犬Honey挑選女朋友，她更野蠻奶奶上身，嚴選未來狗新抱要本性文靜和馴良，還要盡快為陳家開枝散葉。
愛狗之人陳穎妍養了一頭可愛的貴婦狗Honey，她近日更心思思為愛犬覓女友，日前她就約同好友陳霽平到銅鑼灣一間寵物店睇狗仔，陳穎妍先後把三頭狗BB擁入懷中，並對一頭穿藍色衫的狗BB情有獨鍾。
狗BB夠熱鬧
有見廖碧兒的貴婦狗仔交配生下多隻趣致狗BB，令家中增添熱鬧氣氛，令陳穎妍羨慕不已。她在店中一邊把玩狗BB，一邊大讚：「佢好乖，好定性，我上一隻狗仔買嘅時候都係咁定，不過返到屋企就上咗身咁活潑，狗仔太曳好難湊。」
陳穎妍最初誤會穿藍衣的狗BB是囝囝，但後來經過檢查後，發現原來是狗B女，令她喜出望外，而且牠面圓圓十分討人喜歡，故陳穎妍正考慮是否要買下。
陳霽平最愛貓
愛貓的陳霽平早前驛馬星動，不停出埠公幹，家中的貓貓只得暫時交託朋友照顧，但這次在寵物店看到不同種類的狗BB，她對一對柴犬愛不釋手，不時親吻牠們，陳霽平說：「其實我貓狗都好鍾意，不過工作好忙，冇時間照顧佢哋，所以暫時都唔打算買，始終動物都要主人關心，冇時間不如唔好養。」
採訪、攝影：比華利
場地：貴婦寵物店