星爺近年每齣新片都有出色配角憑騎呢彈出，今次《長江7號》也有4個出位角色成功引起觀眾注意。
在片中梳蛋撻頭蝦蝦霸霸的黃蕾，完全演繹出富家子的囂張氣燄，據知黃蕾初時被選中演徐嬌的角色。本是女兒身的黃蕾，甚有演藝天份而且舞藝精湛，早前還參加了百事奧運宣傳比賽，並獲得了廣州區冠軍。
陳俊生的手下，一身蠻力的他經常欺負小狄，由姚文雪反串飾演。姚文雪曾參加不少公開比賽，去年更被李克勤邀請在其演唱會上作嘉賓獻唱。
被形容為怪獸而且傾慕小狄（徐嬌飾）的美嬌，性格怕羞、聲音嬌嗲，但因身形龐大經常被取笑，由韓永華反串飾演，至今還未在公開場合現身，相當低調。
經常辱罵小狄、愛吃鼻屎的老師曹主任，現實中本為有線電視節目助理，後被林海峰賞識，邀請合作主持《有個娛樂乜人台》，再被星爺選中首次接拍電影。
街訪：溫情幽默兼備
周星馳新作《長江7號》前晚首映，吸引不少明星名人捧場，早前本報嚴選了5位星迷贈予每人兩張首映戲票，眾人均對星爺新作讚不絕口。
陳冠希：
之前睇過好多周星馳嘅電影，不過今次套戲同以前嗰啲有好大分別，我最欣賞係套戲嘅創作，同埋特技做得好好。
馮德倫：
我畀十分滿分，徐嬌做得最好，咁細嘅小朋友有咁好嘅演技好難得，仲多戲過星仔，今次係星仔一個新嘗試，套戲好感人。
Ken、Amanda：
老少咸宜，好感人，可以話係笑中有淚，父子情好深刻，好細微嘅位星爺都捕捉到，為人父母睇就更有同感，最鍾意星爺死嗰幕，好感動，好surprise星爺會玩到主角都要死。
Elaine、Julian：
啲戲路完全改晒，都幾感動，我都有睇到喊。啲笑位係比以前少咗，但都有搞笑，而且仲有劇情。最好笑係外星狗死咗之後，星爺用唔同方法搶救佢嗰度。
Joyce、Jeryl：
星爺嘅演技好好，完全感受到嗰份親情，好感動，未試過睇星爺嘅戲會睇到喊，小演員做得好好，喊得好真。呢套戲好突破又新鮮，好成功。
笑料小八卦：死極都死唔去
星爺在《長江7號》中墮樓死亡，其後被外星狗以超能力救回，成為全片最多觀眾抆紙巾的場口。過去星爺鮮有在電影中死去，只曾在《回魂夜》中因鬼上身，為救眾人而要莫文蔚殺死他。另外在《西遊記之仙履奇緣》中的至尊寶也以死作途徑變成孫悟空。
笑料循環再用
星爺的笑料向有方程式，好笑元素一定唔嘥循環再用，如《長江7號》中徐嬌幻想獲外星狗送贈彈弓火箭波鞋，可以凌空躍彈，與《國產凌凌漆》中星爺踩着「篋神」飛天有異曲同工之妙。炸彈炸頭的橋段也屢見不鮮，如《大內密探零零發》中羅家英被炸成膶腸嘴，《長》片中則有李尚正中彈被炸到眼鏡爆裂及門牙剝落（圖）。
