《野蠻奶奶》系列玩盡時空穿梭，黃宗澤由「不留名」變「戈德」，性格亁坤大挪移，竟然英雄變衰公，劈腿、冇格、裙腳仔，不變的是繼續夾在蠻妻胡杏兒和惡母汪明荃之間，兩婆媳經常擘盡喉嚨開拖，戰況轟烈，環迴立體聲循環播放，幾乎震爆他耳膜，更不禁嘆道：「第時我真係咁，死畀你睇呀！」對他而言，塵世間男人最痛，莫過於此。 撰文：朱倬誼
歌德（JohannWolfgangvonGoethe1749-1832）是德國偉大詩人，無綫劇集《野蠻奶奶大戰戈師奶》中也有一個戈德，但夾在妻子與母親之間，搞到一頭煙，認真吟詩都吟唔甩，飾演戈德的黃宗澤直言覺得戲劇反映現實，世上的「戈德」何其多，將來拍拖最好先夾八字，若家中真有兩個女人日日開拖，他笑說：「我真係自殺㗎！」
「人有軟弱一刻嘅」
劇中黃宗澤飾演時裝雜誌社廣告及市務部經理，從小習慣事事由母親兼雜誌社老總汪明荃（阿姐）代為安排，過着無憂無慮的人生。他老婆則是粗魯警花胡杏兒，但其後他與舊愛楊秀惠鬼混，導致婆媳不停開火，更氣得杏兒扯火離婚。
其中一幕阿姐和杏兒的開拖戲，就曾險令黃宗澤變聾耳陳，日前他在電話中說：「嗰場戲拍完之後，我要同胡杏兒claim工傷，佢把聲又高音，直情震爆耳膜，加埋阿姐，係surroundsound！第時我真係咁，死畀你睇呀！戈德都算係男人最痛，好冇自我，冇自由，行出嚟俾人話係裙腳仔，完全冇得反駁。」
黃宗澤又說：「戈德都係軟皮蛇，冇性格、冇主見，又貪玩，呢樣都係佢阿媽養成，所以角色唔難做，好易掌握，但又幾寫實，佢返親屋企都家嘈屋閉，兩個女人咇喱巴啦，都會避啦，所以楊秀惠做咗佢嘅避難所，人有軟弱一刻嘅，其實佢最愛係老婆，只不過喺老婆同阿媽爭執最激烈時，楊秀惠嘅出現多咗衝擊，好似得佢一個明白我咁，會迷茫吖嘛。」問他會否擔心被觀眾鬧為死佬、衰公？他即笑說：「咁都要有呢啲橋段嘅，我同杏兒會復合，所以唔驚，反而係驚楊秀惠俾人唾罵，因為佢又真係做得好喎。」
擲6萬買私伙戲服
由於黃宗澤飾演阿姐這位高品味淑女的囝囝，為配合角色，他特別自掏腰包，花費逾60,000大元先後到D&G、Joyce和連卡佛等名店百貨買私伙戰衣，成為他入行以來拍劇最揼本的一次，他說：「我係一路拍一路買，雖然都有贊助商提供服裝，但阿姐又靚、杏兒又靚，冇理由我唔靚㗎！所以都試吓啲新配搭，着吓短褲襯恤衫打呔呢啲外國打扮，順便滿足自己嘅購物慾。」
攝影：林德雄
化妝：ZoeFanofBeautyTech
服裝：HystericGlamour
髮型：KelFungofDoubleH
場地：SpassoItalianbar&restaurantofTST
搶先爆：勇救愛人激走新歡
今晚播映的第18集《野蠻奶奶大戰戈師奶》，劇情講述O姐（汪明荃飾）表面上支持兒子戈德（黃宗澤飾）與芷喬（楊秀惠飾）拍拖，更趁機勸兩人結婚，但因戈德依然十分掛念麗敏（胡杏兒飾），故未有答應。麗敏因感到工作及感情均不如意，有意辭去總編輯一職，剛巧O姐回雜誌社探班發現此事，故意用激將法單打麗敏，最終令麗敏決定留下來。
戈德與CC（郭政鴻飾）相約到酒吧消遣，巧遇麗敏及CoCo（滕麗名飾），CoCo即場扮醉讓CC背她回家，兩人於途中更表白心聲。至於戈德與麗敏在街上等車時，麗敏險被車撞倒，幸獲戈德相救，兩人齊到醫院敷藥時，芷喬趕到醫院驚見兩人一起，即時追問戈德，最終分手收場。
