被喻為𡃁界女神的19歲模特兒文詠珊（JaniceMan），07年橫掃模界兼殺入影壇，演出電影《愛鬥大》，觀眾對她的表現評價甚高。少年得志，例必樹大招風，對於被指食煙扮嘢整容加臭檔，她說：「呢啲冇乜大不了，如果面對唔到，呢行冇一個人企得穩。」
連電影廣告介紹都以「𡃁界女神」來形容的文詠珊，首次接拍電影《愛鬥大》，4日票房衝破200萬。成績雖不算突出，但大片列陣之下，單憑新人擔正的《愛》片成績已算不錯，所以連監製彭順都說：「𠵱家咁嘅環境，票房可以得兩萬。」
盼日本台灣發展
觀眾對首次演戲的Janice口碑不俗，她說：「今次真正體會到電影同模特兒工作係兩回事，model永遠靚，扮出嚟一定係自己最靚一面。電影就考自己演技同合作性，唔係咁表面，好彩導演畀好多空間我哋發揮。」
第一次拍戲就演出吃重角色，Janice卻坦言模特兒工作一定放於第一位，她說：「最想都係做好模特兒工作先，始終呢個先係主線，遲啲希望有機會可以喺日本或者台灣嘅模特兒行業發展。電影都係第二位，但係今次就真係令我對演戲產生興趣，多咗今次經驗之後可再試多啲唔同嘅嘢。」
14歲就入行成為兼職模特兒，借互聯網之利迅速成名，中五畢業後全身投入模界工作，金髮大眼加可愛表情，擺明扮日本妹。問她那一位前輩是目標？答案是一串日本模特兒名字，她倒也爽快地說：「唔係香港前輩唔好，不過我一直都係留意日本同外國模特兒多啲。」
以「JaniceMan」在網上搜尋找到的，不限於為偶像而架設的網站，還有的是一系列「AntiJM」網站。當中食煙、整容和男女關係傳聞，比娛樂新聞報道更精采，近日更被爆和男友同居。年紀輕輕就面對中學同學仔如斯批評，Janice卻顯得不以為然說：「啲網站我都有睇過，可能佢哋以為我好鍾意showoff，誤會我好自大啦。」
批評冇乜大不了
樹大自會招風，Janice對批評多少仍是有點氣憤：「我覺得都係惡作劇，嗰啲批評我一直都冇回應過，唔開心一定會有，惟有盡量避忌囉。如果唔接受批評一定唔會進步，呢啲冇乜大不了，但係如果面對同接受唔到，呢行冇一個人可以企得穩。」
採訪：藍文浩 攝影：林德雄
場地提供：FIAMMA
