已故詩人徐志摩嘅玄孫（第五代後人）、現年26歲嘅徐偉鈞，早前同女歌手小翼（原名何立楟）組成組合WOW喺台灣發展，近日推出唱片《頭號人物》，佢哋以Rap加HipHop同DJ概念打造新音樂，為樂迷帶嚟新鮮感。
媽咪穿針引線
WOW前晚喺台灣應永豐餘造紙業集團邀請做尾禡騷，呢個集團創立80年嚟第一次搵藝人演出，WOW之所以會接到呢個騷，原來係徐偉鈞嘅媽咪劉瑞娥，係呢個集團嘅發言人兼公共事業部協理，員工仲特別投票選出要WOW嚟表演，佢哋就打番過6折約收15,000蚊酬金演出，佢哋總共唱咗《IBelieveinLove》、《再別康橋2007》、《GetHigh》等六首歌，現場員工都聽到如癡如醉。
自添新詞致敬
講到《再別康橋2007》呢首歌，係徐偉鈞喺徐志摩嘅名作《再別康橋》，加入Rap嘅部份，變成07的HipHop版，徐偉鈞仲講過：「希望用這首歌向先人致意。」
孝順仔徐偉鈞今年賺到錢，話新年打算封66,000新台幣（約16,500蚊港紙）嘅大利是畀媽咪，徐媽媽就話會封番88,000新台幣（約22,000蚊港紙）畀乖仔，WOW拍檔小翼聽到即刻好羨慕。