港股跌得咁急，好多散戶走唔切，點算呢？散戶心態真係估佢唔到，網友abc11喺《香港討論區》問：「兵荒馬亂你哋會點揀？」八成人（330個回應）竟然話死揸唔放，仲有26個網友（佔6%）回應話越跌越溝貨，只有17個回應（約4%）話沽晒啲貨。
同個市鬥長命
一手牆紙，仍然死揸嘅網友都係因為深深不忿，唔少人同魔裟斗一樣咁諗，「同佢鬥長命。」wing_mak2000就講出大部份散戶嘅理由：「一日未返到家鄉，一日都唔會放㗎。」
mikesze較冷靜咁講：「升跌只係一個循環，有命嘅等吓又何妨。」disgust.com.hk附和：「死揸，又唔係等錢使，驚咩？」
simontse1992回應：「欣賞死揸嘅同志，大家一齊努力！唔好學師奶們恐慌性拋售。」deeoooo就有啲睇唔過眼話：「股票升時唔放，因為覺得仲有排升，跌嘅時候又唔止蝕，反而安慰自己只係大調整，個個都走火入魔。」