港股連續兩日都創下新紀錄，前日係大跌指數，噚日係大升指數，恒指又上番250日線（23510）之上，形勢又轉危為安。
美國聯儲局突如其來重手減息0.75厘，本港「焗」跟，即係迫啲錢入番市，加上內地同香港嘅基本因素仲係好好，就算俾外圍拖累，影響程度亦不會大，過埋呢幾個交易日，就會踏入鼠年，港股亦會有一番新局面。
噚日大市高開，但早段仲有機會畀大家買平貨，恒指低見22647，升唔夠900點，中段之後，有大盤殺到，連掃帶搶，一路掃到高收，恒指重上24000點大關，收24090，大升2332點，升幅10.7%；H指亦有1367點進賬，升幅更達11.4%。跌市以來嘅第3個下跌裂口（23770至22714）已全部補回。
恒指可望重上26000
恒指噚日第1日反彈，若未來幾日能守穩在250日線之上，則第2個下跌裂口（25824至25131）亦有好大機會補回，樂觀睇法，今次反彈可重上26000點。
大價藍籌同中資股全部發威，升幅十幾個巴仙都有好多隻，好似中國人壽（2628）、中石油（857）、建設銀行（939）、中海油（883）、中石化（386）及中國財險（2328）等，都大升15%至19%，甚至滙控（005）都變番醒獅，大升11.3%。
中資同H股強力反彈，特別係H股期指在尾市急衝一段，掃到上13517高收，變成大高水238點，說不定內地短期內會有「救市」措施出台，解一解股民嘅怨氣。
6行3保已彈出，同樣有銀行及證券業務嘅光大控股（165），則仍然在低位踏步，噚日最高21.2元，但收20.0元，僅上升0.48元，升幅2.4%，大大落後。
揸半年會有大豐收
兩個半月前，光控上過37.7元，前日跌到落18.8元，足足跌咗5成，但同類股好多都由低位彈咗20%，光控就只較低位升得6%，以反彈前跌幅的0.382計，光控已可重上26.0元水平。
現價博入光控，有分拆光大銀行同光大證券呢兩個大概念「照住」，贏面應該好大，而且唔使等好耐，半年時間已可成事，26.0元係短線目標，中線有機見4字頭。