家陣股市郁吓都上落2000點，莫講話散戶冇路捉，連分析員都隨時要調整自己嘅預測，所以舊年兩次測錯市嘅堪輿學家楊天命，仍然有人搵佢測市。荷銀連續兩年邀請楊天命，為旗下私人銀行客戶舉行08經濟展望暨風水投資講座，為投資者指點迷津。
睇番楊師傅往績，「預測」去年10月17同29號出現股災，提醒投資者要沽貨離場，結果兩日恒指分別升344點同1181點，楊師傅都認自己估錯市。不過，如果華華係楊師傅就點都唔認錯住，股市嘅嘢，有升必有跌，恒指自從10月30日，以歷史高位31638點收市後，一直浮浮沉沉，跌到噚日，足足從高位回落7548點，所以睇你點理解同參詳箇中玄機，呢啲咪就係玄學囉。
鼠年屬土水利6行業
前事不提，楊師傅話，對股市仍然樂觀，內地股市到農曆5至7月，會到達前所未有嘅高點，但物極必反，升得高時跌亦急，將有一次大調整。至於港股，相信農曆1至2月，將有好消息公佈，3月正值舉行08全國兩會，楊師傅話，好有可能落實港股直通車，就算未通都可以公佈細節喎。由於鼠年係戊子年，五行屬土水，利基建、網絡、通訊、航空、旅遊、交通等行業，楊師傅算過後，得出中交建（1800）、中鐵（390）、中移動（941）、中電信（728）、港鐵（066）應該幾強勢入得過。
散戶最擔心美國次按會拖累大笨象滙控（005），不過楊師傅話：「滙控一定要買，不過等到09年先買，因為對正滙豐總行嘅天星碼頭要拆，簡直係『太歲頭上動土』，唔慌有運行。」到09年工程完畢就買得，睇兩年，目標價180蚊。
冬天出世炒股有運行
按季節計，夏天出生嘅人今年運氣最旺，名副其實「不勞而獲」，符符碌碌買得正走得快；秋天出生嘅人都唔錯，屬第二好運，不過就要小心奧運後運勢較弱；冬天出生嘅人就最夾鼠年嘅大市，夠膽可以盡量投資；春天出世嘅人運程一般，1、2月記得要忍手唔好入市。
今年犯太歲嘅生肖係鼠、馬、兔，楊師傅建議，特別留意冬天，宜到星馬泰走走借運，千祈唔好動土，仲最好帶番個羊玉吊墜傍身。鼠年財位在正東，不妨在東面放啲郁動嘅嘢，好似魚缸或者風扇。
華華提醒大家一句，堪輿術數之說僅供參考，投資最緊要睇公司增長前景同市場情況呀！
電郵：mailto:[email protected]
楊天命去年10月預測成績
預測日期：10月17日
預測恒指下跌：約700點 恒指表現：升344點
預測日期：10月29日
預測恒指下跌：約700點 恒指表現：升1181點