全球股市出現恐慌性拋售，港股也不例外，繼前日恒生指數大跌約1,383點後，昨日再暴瀉2,061點至21,757點收市，以點數計是歷來最大跌市，港股兩日加埋跌幅達3,444點，股民身家大縮水，娛樂圈藝人也輸到叫苦連天，損失過百萬的比比皆是，包括有何超儀、周美鳳、施念慈和吳文忻等，輸得少的如曹永廉等，都達六位數字，幸好眾人雖然口講「輸到喊」、「阿媽都唔認得」，但都能冷靜和積極面對起跌，其中榮雪梅則表示會趁低位密密吸貨，一於冇有怕。採訪：林妃
何超儀：見到都心噏
損失金額：過百萬
「唉！真係輸到喊呀！今日見到個市跌成咁，真係開市已經喊咗一輪，希望阿爺（指中央）快啲批准直通車嚟香港啦，等個股市會回升。𠵱家個市好唔穩定，有啲人會趁低吸納，但我覺得低處未算低，暫時我都唔敢入市住，我買啲股票全部跌晒價，真係見到都心噏！收市時，計吓損失，我都忍唔住想再喊，唔好問我蝕咗幾多錢，總之蝕得好甘啦！如果跌到20,000點，我就狂入！」據知超儀差不多損失過七位數字。
曹永廉：輸10萬奶粉錢
損失金額：六位數
曹永廉的妻子姜依蘭剛在元旦誕下兒子，昨日阿廉接受訪問時表示大跌市輸了六位數字，他說：「今日開工都冇理到，啲股票由佢放喺度長揸，擔心都冇用，冇得郁，所以唔諗咯，反正我都揸咗好耐，由佢囉！實際損失六位數字啦，都唔係我一個輸，大家都中招啦，我唔會溝貨，確實個巿係睇淡咗，我身邊有朋友大大件事，但唔淨係娛樂圈藝人嘅。睇耐啲啦，我諗住輸少少都OK嘅，冇諗過要等到贏番錢。」
吳文忻：唔想計，冇眼睇
損失金額：過百萬
「我梗係有事啦，𠵱家都冇晒錢入貨咯，我都唔想計損失幾多，冇眼睇呀！損失梗係嚴重啦，梗係唔止六位數啦，幾多我唔想講呀，費事屋企鬧呀！去到呢個地步都冇辦法啦，放唔放睇吓情況啦，唔等錢使咪唔放住咯，蘇民峰話下半年會升吖嘛！好彩我之前喺跑馬地買咗樓（以600萬買入約800呎單位），放咗啲股票，唔係仲慘呀。」
周美鳳：蝕到阿媽唔認得
損失金額：100萬
「輸到阿媽都唔認得呀！呢一輪，由25,000點開始，起碼唔見咗100萬，本來想買隻靚錶過年，都係遲啲先喇。我覺得今年係好難，次按問題一向都知大鑊，舊年唔係自由行、阿爺照住，都頂唔到咁耐。𠵱家終於爆喇，好多人都重傷。我就唔係好難過，因為舊年賺到，我睇4月前都仲會上上落落，所以都唔會撈底喇，低處未算低，永遠唔好大跌市再買，即係打風唔好游水嘅道理，觀望住先啦。另一個比喻就係𠵱家係隔籬屋火燭，未燒到埋嚟，但消防救火都會淋濕你間屋囉，有影響，不過未燒身家。」
施念慈：做咗大閘蟹
損失金額：過百萬
「損失約七位數啦，不過一日未沽貨都唔算輸嘅，如果再跌我會溝貨，不過美國一日未減息都仲會再跌，今日我都有換馬，揀中鐵（390）、中材（1893）呢啲穩陣、少蟹貨嘅股票。我心情冇乜嘢，朋友個個打嚟，其實大有大輸、細有細輸，反正有全世界陪，又唔係淨係香港，希望過埋農曆新年會好啲啦。我前兩年都冇食過大閘蟹，上年11月開始到𠵱家食咗10幾隻，點知真係做咗大閘蟹。」
陳豪：最緊要唔好跟風
冇乜輸贏
「我一向穩陣派，放長線多，要睇行業前景，唔係睇數字，今次冇乜影響，力不到不為財，講到錢一定親力親為，最緊要唔好跟風，唔係會輸死你，我曾經試過由六位數投資變剩五位數，喺錯誤中學習。」
榮雪梅：可以分段入市
趁低撈貨
「大跌市冇問題，我唔係短炒，上上落落三兩千點係冇問題嘅，唔會損手。我唔係睇一兩年，平買嚟擺，𠵱家跌得好，跌一跌比較安全，因為之前個市炒得太高，我啲心水股票都太高價，𠵱家回落番正常水位。我呢幾日都可以分段入市，梗係買我兩大愛股：中移動（941）同中國人壽（2628）啦，好價嘅話，我會一路入啲，因為中國經濟未來一定好。」
