噚日個市大跌超過2000點，有散戶恐慌掟貨，亦有散戶趁低吸納。俾孫柏文形容為最有sense嘅跑馬地陳先生，喺跌市中推介中國電信（728），佢話「上個禮拜沈大師（沈振盈）話可以吼5蚊至5.5蚊撈貨。」陳生建議5蚊買入，目標價睇7蚊，4.5蚊就止蝕離場，短炒三個月。噚日中電信收報5.33蚊，跌0.71蚊或11.75%，股價都幾硬淨。
原來亨達集團研究部董事黃敏碩已經身體力行，「中電信value合理，我要申報番喺5.5蚊樓下撈咗啲貨，要留意股份有可能受其他利淡因素而overshoot，可以留意番發牌嘅事；中移動（941）反覆程度大，中電信相對吸引。」陳生聽完都話會有所行動，同時睇好中鐵（390），「08年好多基建項目上馬，刺激內需，比較穩陣。」
中鐵具壟斷優勢
黃敏碩都同意陳生講法，仲話「畢菲特都睇好鐵路股同行業前景，中鐵本身有壟斷優勢，仲不斷接海外合約，同中策（235）方面可能有框架協議。今年中交建（1800）同中鐵呢兩隻都可以並駕齊驅。」
4月或有小陽春
陳生再追問孫柏文，減息之後個市會點，孫柏文就話：「我覺得佢減半厘，因為伯南克唔可以減咁多，可能銀行或者聯儲局會做多啲野，拆倉嘅情況應該會繼續。」黃敏碩提醒陳生，要留意可能有下一浪嘅失望沽售，認為4月迎奧運會有個小陽春反彈。
阿里巴巴（1688）
15蚊分段入
屯門李小姐推介阿里巴巴（1688），佢話阿里巴巴由40幾蚊跌落嚟，想喺15蚊分段入，目標價睇25蚊，止蝕位定番喺招股價13.5蚊，佢話：「唔係好貪心，希望半年賺到10蚊。」
孫柏文就話阿里巴巴係跌八成嘅大熱門，40蚊應該跌落8蚊。黃敏碩比較正面，認為「阿里巴巴業務有獨特性，估值雖然偏高，但15蚊算係合理，新嘅業務同發展空間都有，而複合增長率都幾好，可以分注入。」
李小姐問，如果分注應該幾時入，黃敏碩話要睇番市況，「起碼市況穩定，信心大啲，再去撈番隻股份，當有水位，就可以留意，不過就未必可以一下子上番去20蚊、30蚊水平。」李小姐又話，好多大行睇30蚊，黃敏碩指，大行係一條龍服務，講完個價又修正，「最緊要睇番個point有無支持力。」
盈大地產（432）
PE低追落後
銅鑼灣Frederick冷敲地產股盈大地產（432），佢話：「盈大起嘅貝沙灣一期，由4000幾蚊呎炒到過萬蚊，唔敢估佢第三期會賣幾多錢，啲獨立屋仲唔使諗，但家陣盈大嘅股價都仲係兩個幾，市盈率（PE）只得單位數字，地產股呢幾年走勢應該會幾活躍，相信盈大有機會追落後。」佢建議現價2.16蚊入貨，噚日盈大急跌11.8%。
黃敏碩考吓Frederick，佢問：「貝沙灣之後，盈大仲有冇樓推出？」Frederick即該話：「北京有盤起緊，喺上環有個重建項目。」
黃敏碩話：「冇錯，但比例唔多，現時盈大嘅股價，已反映貝沙灣嘅價值，嚟緊有冇上升空間，係要睇未來樓盤落成量，睇唔到短期內有爆升可能，要吼有新盤推出，股價先有機會彈上。」
孫柏文插口：「盈大嚟緊嘅上環樓盤好細，賺錢唔多，相信盈利將無以為繼，點解港鐵（066）咁多人追捧，係因為有政府係咁泵地，樓盤不絕，盈利有保證嘛。不過𠵱家盈大股價再跌空間有限，現價買入都可以博吓嘅。」黃敏碩補充：「有得揀，盈大唔係首選，有其他更吸引嘅地產股。」
中海油（883）
拉勻唔使蝕
美孚陳太噚日打嚟講隻中海油（883），佢話：「喺10蚊同8.5蚊，分別買咗2萬股同1萬股，呢幾個禮拜佢係咁跌，佢仲會再跌幾多呀？」中海油噚日急插12.8%，收報9.65蚊。
黃敏碩同孫柏文都「戥」陳太抹一額汗，佢哋話：「都好彩，喺咁嘅跌市，拉勻嚟計都仲未使點蝕。」孫柏文繼續話：「𠵱家中海油跌穿10蚊，自己都開始有興趣，如果再跌啲，就會入貨，所以你唔使太驚，可以放心keep住，話晒中海油係三隻大陸石油股中，未來石油增產量最樂觀嘅一隻。」
陳太都仲有啲憂慮，佢話：「啲人話美國經濟衰退會影響油價噃！」孫柏文話：「呢樣嘢你唔使太擔心，美國人寧願斬斷自己嘅腳，都唔會唔揸車。」黃敏碩補充：「中海油係三隻石油股中，較少下游業務，最能緊貼油價。」
陳太再追問：「中海油係恒指成份股，恒指再跌，中海油乜唔係會跌咩？」黃敏碩解釋：「你要搞清楚，唔係恒指跌令中海油跌，係成份股跌先令恒指跌，兼且中海油佔恒指比重並唔係太高。」
新地（016）
博大幅減息
北角阿Ben推介新地（016），建議買入價136蚊，目標價160蚊，睇升一成八，佢話：「博下星期美國大幅減息會反彈，新地喺136蚊係一個好強嘅支持位，可以放心喺呢個價位入市。」新地噚日一度急挫8.7%，收報141.7蚊，跌6.2%。
孫柏文話：「唔反對喺呢個價位買入。」黃敏碩都同意咁話：「近期大市出現唔少調整，經重新洗牌後，地產股可以低撈或者增持，暫時睇唔到地產前景會轉差，新地作為地產龍頭股，有穩定樓盤推出，可以分段撈貨。」孫柏文好奇問：「咁你估聯儲局會減幾多厘息？」阿Ben話：「見報紙話減四分三厘，重手啲有機會1厘。」
孫柏文就話：「自己相信只會減半厘，所以市場會有另一輪失望。」黃敏碩補充：「如果係咁，大市有機會再嚟一次跌浪，新地有機會落到呢個價位。」
Ben建議
建議買入價：$136 目標價：$160
止蝕價：$130 時間：3個月
今日嘉賓：東方匯理衍生產品董事李靄欣
每日收市後4:30pm
歡迎Phonein28698262
http://appleactionews.com/features/finance/
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，
登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
