呢排睇運程書，要為鼠年家居風水擺陣。睇過玄學家楊天命、麥玲玲嘅書，話家居南、西北位都唔係咁好，要擺銅製物件化解。噚日去風水擺設舖頭睇，唔平㗎，雞蛋咁細銅擺設都成百蚊，個老闆話年尾好搶手，仲要小心唔好買到仿銅。
理工大學機械工程學系工程師盧覺強解釋，仿銅係喺其他金屬如鐵、鋁鍍上銅，肉眼好難分，但如果係鐵，用磁石攝吓就知，而鋁就輕好多：「全銅擺設好重手，比仿銅貴好多。」
另外，真銅又分為古董銅同仿古銅。麥玲玲話，銅自古有寧神作用，皇帝都會瞓銅床，玄學認為銅可以隔絕病等唔好嘅嘢，但要真銅，否則無效。佢又話古時鑄銅錢時會先祭天，所以古銅錢尤其清朝頭六個皇帝嘅興旺期，傳統認為可以辟邪，仿古銅錢就冇效。
咁點分古董銅同仿古銅？盧覺強話，銅經過長時間氧化會出現銅綠，而用鏹水「揦」都可以有相似效果；但經歷幾百年嘅銅綠會好硬淨，唔易刮甩。不過，當然搵專家鑑定最穩陣。
逢周一至周四刊出