全球大股災，所有支持位都失守，港股噚日一開已大裂口跌穿250日線，低開近900點，之後再跌多千幾點，午後試過有一段時間反彈，但都係要低收，恒指報21757，大跌2061點，跌幅8.6%，以點數計，應該係一個紀錄，中資同國企股更慘被蹂躪，直情跌到面目全非，H指12000點大關應聲而穿，低收11911，大跌1619.54，跌幅12%，又係另一個令人痛心嘅紀錄。
「終極一跌」目標在那裏？非理性拋售仲會維持幾耐？在現時全球骨牌式效應的大跌市下，斬倉盤湧現，大藍籌股一日嘅跌幅都成10%，而個別三四線股份更大跌2至3成。幾時到底？冇得估，就算係跌多一兩日，指數都可能跌多10%。
採分段入市策略
不過，有危就有機。今次大跌市，亦創造了千載難逢的入市機會，噚日跌到22000點水平時，已將第一注資金入市，估計分段入市的策略在恒指20000至23000點區域內可以完成，等年中收割。
港股由去年10月底31958見頂回落，到噚日的低位21709，共下跌10249點，幅度係32%，已否定咗係牛市中的一次中期調整，亦確認熊市已來臨，以熊市中一個跌浪平均下跌40%計，今次恒指有機會跌到19000點，才會出現反彈。
港股見頂後開始的跌浪，到目前為止共出現3個下跌裂口，第一個係去年11月2日（31342至30922）；第二個係今年1月16日（25824至25131），翌日指數曾見25382，補回部份；第三個係噚日的23770至22713。一次大跌市，可能會有3至5個大裂口，而在其後的反彈中，最後的兩個裂口通常都可以回補，亦即第三個下跌裂口有9成機會可以回補，而第二個則有5成機會回補，即恒指可反彈上26000點才再尋底。
可吼國壽中石油
部署入市博反彈，主力除中國人壽（2628）、港交所（388）外，可加入中石油（857）和港鐵（066）；至於近日大跌幾成嘅股仔，亦可以小注入市，博賺3至5成。