環球股市變天，咩嘢級數嘅投資者都嚇到面青，華華聽相熟地產代理講，本來噚晚有啲老細飯局，都要臨時取消。
叫得老細，當然係樓市股市都一樣揸重貨，個市跌到阿媽都唔認得，仲食鬼食馬咩。
97驚弓鳥越諗越慌
有啲經歷過97年嘅代理仲悲，話睇怕嚟緊啲新盤定價都唔會去到咁盡，因為班老細喺股市輸到面青，仲點會揼咁多水去幫發展商托高新盤樓價吖，一環扣一環，佢哋嘅佣金收入好自然會由高位回落咁。有位「97驚弓鳥」，越諗越慌，連本來約好班行家食餐勁嘅飯局，都要泡湯收場。
97驚弓鳥越講越悲，佢話舊年做新盤雖然好好搵，但係過程嘅辛苦就唔係個個頂得順，好似話試過賣某個市區豪宅新盤，佢朝早九點帶個客去售樓處，等好有威嚴嘅發展商阿頭攞單位出嚟賣，食足三餐都未有着落，結果食緊消夜先有貨，時為半夜一點鐘，個客幾乎當咗佢係仇人，一生不作往還咁滯。
睇好睇壞各半
以為個市又淡過，點知噚晚美國突然減息四分三厘，華華立即搵番97驚弓鳥，佢話班行家普遍睇好，因為減息對樓市有幫助喎。
咁樣啲豪食飯局仲有冇着落呢？佢話，睇定啲先講啦，就算個市冇事，都要顧吓自己啲膽固醇咁話喎！