第八回--歌手出身但發展並不順利的王浩信，轉而拍劇，並在《野蠻奶奶大戰戈師奶》中飾演雜誌社太子爺Mark而為人認識。王浩信自爆首日開工便要錫胡杏兒面珠，結果因為頻頻NG而錫足20次，令他極度尷尬，幸胡杏兒悉心教路，才令他順利過關。 撰文：藍文浩
首次拍劇的王浩信於《野蠻奶奶大戰戈師奶》中飾演雜誌社太子爺阿Mark。劇中阿Mark突然空降到雜誌社跟阿姐鬥法，故意改革創新大搞對抗，引發不少笑料。其後他更起用阿姐新抱胡杏兒任高職，又伺機將阿姐迫走。除了辦公室戲份，阿Mark亦一直對胡杏兒虎視眈眈，不斷借工作關係高調追求已是有夫之婦的杏兒，令黃宗澤妒火中燒。
面對阿姐騰雞
首次拍劇就參與乘勝追擊的《野蠻奶奶》第二部，更要與原裝極受歡迎的阿姐、黃宗澤和胡杏兒合作，王浩信又驚又喜，他說：「其實拍呢套劇有兩件事真係令我好難忘，第一件就係第一日開工，第一個shot就係要錫杏兒。我都有啲覺得係導演整蠱我㗎，如果同杏兒熟啲先拍會自然啲。咁樣難度對我真係好大，仲要好多個唔同角度咁拍，加埋NG前前後後都錫咗杏兒成20次，嗰日尷尬到七彩，好彩杏兒教我，叫我當佢係女朋友，仲教我遷就燈光同鏡頭等等，直頭係唔明講到明。」
錫杏兒尷尬，但與認真工作的阿姐合作才是真正考驗，王浩信說：「第二日開工就拍一場我升咗杏兒做雜誌社老總，之後我去寸阿姐嘅戲。之前聽過好多傳聞，話阿姐好惡，最憎人遲到，仲話最驚啲新人唔知自己做緊乜嘢。面對佢其實真係好難入戲囉，點知阿姐一見到我就話：『哦，你就係嗰個新人呀。好啦，畀你NG十次啦』，聽到佢咁講就仲緊張，好彩最後3、4take就拍好。」
背熟對白獲讚
換着誰聽到老行尊汪阿姐這樣說亦一定會手心冒汗，幸而王浩信充足準備令阿姐另眼相看，他說：「後來又有一場，係我、阿姐同杏兒三個演，對白好長，但係我之前已經將啲對白背到爛熟，最後一take過講晒出嚟，阿姐事後仲讚我記性好。」劇內的他每次出場，不是媾女就是戚起眼眉寸O姐，好一副闊少模樣，王浩信說：「都驚觀眾以為我真係咁，不過如果佢哋真係憎我即係自己成功。我有朋友個媽咪都問佢我係咪真係咁寸，好彩大部份反應都係做得幾搞笑。」
出身歌手、卻因為電視劇而為人認識，難得王浩信沒一絲憤恨，反而主動提起。他說：「拍呢套劇對我有好大影響，之前出道係歌手，發展唔係咁順利，出面其實唔係咁多人知我係歌手。拍劇就係希望可以更多人認識，好彩我遇到呢個咁好嘅機會，可以將自己嘅努力畀人睇到。大家睇完覺得我個角色搞笑就已經係一個最好嘅證明，雖然呢行好現實，好難去控制，不過今次真係我一個好重要嘅里程碑。」
搶先爆：遭兒責罵離家出走
今晚第16集《野蠻奶奶大戰戈師奶》，講述O姐（汪明荃飾）揚言後悔讓麗敏（胡杏兒飾）嫁入戈家而被戈德（黃宗澤飾）責備，一怒之下帶同工人Audrey（夏萍飾）離家出走，到南丫島居住，不過最後O姐連Audrey都鬧走，只剩孤獨一人。
麗敏舅父言有信（艾威飾）因老婆（汪琳飾）炒輸股票走佬，於是帶着剛出生的BB找戈德訴苦，戈德在舅父口中明白母子、夫妻相處之道，之後想盡辦法令麗敏原諒自己，更承諾會辭去證券公司工作。其後戈德卻瞞着麗敏考得經紀牌，被麗敏揭發，麗敏對戈德極度失望，決意跟他離婚。
