擁33C豐滿上圍的動漫Maggie李曼筠，憑性感形象大小通殺，驟成商場活動新寵兒，雖然她豬籠入水，但慳妹本色依舊，日前她到超市掃貨，也逛勻3間超市格價，才買下盒裝鮮奶及$4.9元4個的特價梨等，以形補形都不忘慳家行先，其慳儉程度確屬難得。
現年19歲的動漫Maggie李曼筠出道以來，從不吝嗇性感，經常在公開活動上大晒豐滿上圍，難怪入行短短日子已賺個盤滿缽滿，不過出了名慳家的她仍繼續慳妹本性，日前她到旺角出席《愛鬥大》電影宣傳活動後，隨即坐車到其大埔屋邨寓所附近的超市掃貨。
比師奶更專業
想不到動漫Maggie購物總值才約30元，但竟逛足3間超市格價，比起真正師奶格價更專業。當日下午6時多，穿着迷你裙的動漫Maggie於旺角完成電影活動，在街頭與10多名男fans合照及簽名後，才坐車直往大埔，她落車後即到銀行提款機櫃位㩒錢，繼而到大埔超級城吉之島百貨公司內的超級市場選購蛋糕粉，見她左揀右揀，終於揀了售價最平、價值$21.5元的BettyCrocker蛋糕粉，然後便到收銀處排隊付款。其後動漫Maggie步往商場的百佳超市，她內進後直接走到擺放奶類產品的凍櫃，但瀏覽了一會未有幫襯，兩手空空離開，再步返其富亨邨住所，雖然沿路不時有男士向她上下打量，更有人對她吹口哨，可是她完全懶理，施施然到屋邨樓下的超市購物。
購$4.9特價梨
現場所見，動漫Maggie進超市後又到凍櫃，揀了一盒鮮奶，隨後便選購生果，經她細心格價後，終買了一盒4個裝、價值$4.9元的特價梨，付款後即返家慢慢嘆。山大斬埋有柴、搵埋唔少的動漫Maggie慳家至此，相信娛圈中只得楊思琦跟她有得揮。
採訪、攝影：娛樂突發組
