上次講開紅、黑米，好多網友朋友都話想知多啲，尤其係女仔，其中靚女同事嘉雯話開始食糙米，健康啲喎（我估佢梗係想纖體啦），但佢話糙米好易變壞，都唔知點解。
我問番消委會個friend，佢話由於糙米含天然油份，保存太耐會容易氧化變質，所以保質期比白米短，喺室溫可以儲存大約半年，如果想保留耐啲，應該密封同埋放入雪櫃。
佢仲話稻米係由穀殼、糙米組成，除去穀殼後就係糙米。糙米包括外層嘅米糠、同埋裏面嘅胚乳（即係我哋成日食嘅白米），所以白米同糙米嘅營養價值，分別在於米糠。米糠含豐富營養，包括維他命B、礦物質、脂肪酸，同膳食纖維，但白米主要係碳水化合物，所以糙米營養價值高啲。
研究發現，食糙米有助預防中風、糖尿病、肥胖、腸癌等。我第一時間同嘉雯講咗，因為真係希望開始化妝扮靚嘅佢，唔使嘥錢搵命博去整容，一樣可以健健康康咁變靚啲，費時益咗部份無良纖體公司。
逢周一至周四刊出