噚日大市反彈2332點，香港嘅滙豐銀行唔止跟足美國聯儲局減息四分三厘，滙豐控股（005）亦都跟住大市齊齊反彈。屯門李小姐喺113蚊買入，目標價睇120蚊，105蚊止蝕，純粹短炒，佢話：「喺茶餐廳聽見啲人話抵買，咪去望望囉，見佢朝早抽上去，唔理咁多入咗先。」
滙豐噚日的確係市場焦點，一度升成12.7%，高見117.7蚊，最後收116.2蚊，升11.8蚊或11.3%，成交近百億，仲做埋最活躍港股龍虎榜嘅榜首。
130蚊樓上多蟹貨
東方匯理衍生產品董事李靄欣話：「之前滙豐喺130蚊左右，以為橫行一排可以再上，市場憧憬會爆上去140蚊，點知跳水咁跌咗落嚟。滙豐喺130至140蚊左右有好多蟹貨，現價可以考慮小注入，如果揀窩輪就唔好揀太高價。」
李小姐再問，可唔可以推高啲目標價，又問值唔值得博反彈？孫柏文話：「唔係跌得多就可以博反彈，如果博反彈不如睇中移動（941）。」
中移動未穿過200天線
李靄欣回應李小姐：「如果博滙豐116蚊去番130蚊，不如博中移動去到130蚊，機會仲高。睇番中移動200天平均線喺110蚊，都未穿過，而且蟹貨較少，值博率更高；再加埋中移動一直以嚟上客量都唔錯，業績亦唔差。」
孫柏文話，次按都影響唔到中移動嘅業務，暗示滙豐有次按，掂唔過！
中石油（857）
反彈力好強
西貢黃先生睇好中石油（857），佢話：「今日中石油嘅反彈力度好強，仲勁過中移動（941）同滙豐（005），已經補番噚日嘅跌幅。中石油會喺3月公佈業績，相信盈利會比舊年勁好多，對股價應該有幫助，估計佢喺3個月內有機會返番舊年9月嘅14蚊價位。」
黃生認為現價11.3蚊買得過，揸3個月，目標價14蚊，睇升兩成四。中石油噚日急升17%，收報11.3蚊。不過，市況咁波動，黃先生都有啲擔心，「中石油會唔會多窩輪蟹貨，拖低反彈力。」
李靄欣表示：「中石油輪喺11至14蚊嘅蟹貨唔多，最多喺18至20蚊之間，以窩輪作部署，可以揀貼價啲，好似喺12至13蚊價位，呢兩個月到期嘅中石油窩輪，都會喺行使價內，應該唔會有太多輪商沽番啲正股。」
中國中鐵（390）
具影子概念
柴灣羅先生推介中國中鐵（390），佢自己仲喺9.2蚊買咗貨，諗住揸3個月，目標價10.5蚊。點解睇好？佢話：「基建股防守性強，嚟緊3月隻中鐵建新股又話會上市，相信中鐵有影子概念，股價有機會炒番上去；加上早輪公佈話中策（235）會收購中鐵嘅蒙古礦業，咁對中鐵嘅盈利一定有幫助，所以大家可以喺廿天平均線嘅9.2蚊價位入貨。」
李靄欣問：「你有冇留意另一隻基建股中交建（1800），佢今日嘅反彈力度仲強噃。」羅先生即刻話：「冇睇到喎。」李靄欣就話：「今日隻中交建反彈14.8%，隻中鐵就只有7.8%，似乎中交建上升力度強啲，而中鐵嘅市盈率又比中交建為高，如果揀基建股，寧願選擇中交建。」
羅先生仍然鍾情中鐵，佢話：「但比較股價，隻中鐵吸引噃。」中鐵及中交建噚日分別收報9.43蚊同19.38蚊。
洛陽鉬業（3993）
短炒睇$11.5
美孚陳太推介洛陽鉬業（3993），佢話：「隻洛鉬呢幾日跌咗幾多，股價幾吸引，不過家陣市況唔穩定，只係諗住短炒3、4日，可吼10蚊買入，目標價11.5蚊，睇升一成五。」洛鉬噚日一度急升11%，最後收報10.38蚊，升6.5%。
屬基金愛股
李靄欣表示：「個推介唔太差，洛鉬嘅股價喺12至13蚊都橫行咗一排，早排先跌穿，佢不嬲都係基金愛股，貨源唔多，股價有機會上番呢個目標價。」孫柏文指：「洛鉬比普通礦業股貴，鉬礦係工業用，所以對世界經濟敏感度高，不過，短炒洛鉬係OK，估計唔少基金都會喺呢個價位入。」李靄欣補充：「洛鉬10個幾嘅價錢唔多見，佢一上市個股價就升得好快，雖然家吓佢由高位回落咗咁多，但市盈率仍然唔平。」
陳太好奇問：「點解美國減息，美股都跌咁多嘅？」李靄欣就話：「美國噚日一開市係跌得急啲，可能係因為上個禮拜已經做咗嘅沽盤，不過，跟住好快啲買盤湧入，而美國嘅消費同金融股都表現唔錯，反映市場有番啲信心，刺激今日港股。」
