曼聯球星朗尼終於做「1哥」啦！究竟選咩連C朗、卡卡、美斯都要行埋一邊？之咪係最醜樣球星選舉囉。不過好多「選民」都話：「睇錢份上嘅話，都願意同醜星出街。」我求大俠即時諗起趙傳嘅老歌：「我很醜，但我很富有（溫柔）！」
呢次選舉由英國網站www.thepeoplesclub.com舉辦，選民全部係女性，結果外號「史力加」嘅朗尼以33%大熱當選，壓倒巴西「哨牙孖寶」朗拿甸奴（第2）同朗拿度（第5），曼聯隊友「疤面煞星」泰維斯排第3，利物浦「火柴人」高治得第4，皺晒皮嘅科拿就排第7。
6新舊紅魔入醜人榜前10
最奇怪係，前10名醜星竟有6位係現役或前曼聯球星，好似第10位嘅「馬面」雲佬、第9位嘅「光頭」里奧費廸南、第8位費查同第6位嘅查域克。所謂各花入各眼，點解女性覺得「紅魔」啲人零舍樣衰？睇嚟曼聯一係賽前為球員化好妝，一係就做好啲對女性嘅宣傳工作。
我求大俠唔係好欣賞朗尼，不過呢次都要鼓勵佢咪心灰。頂天立地嘅大丈夫冇樣唔緊要，最緊要有兩樣嘢：財同才！好似五分之一女選民都講出心中話：「純粹睇錢份上，都會願意同醜怪球星出街。」所以話容乜易用兩塊硬幣遮住凡人對眼呀？
當然，有錢有才又有樣嘅就梗係絕世好男人啦！好似朗尼嘅曼聯隊友C朗，最近就用25,000鎊（約38萬港元）買咗架平治，作為患乳癌嘅媽媽53歲生日禮物。最近朗伯母仲上埋西班牙《阿斯報》頭條，話希望個仔加盟皇馬，咁自己就死得眼閉，唔知呢位孝順仔會不會聽阿媽話呢？
點都好啦！曼聯有醜星朗尼同「帥哥」C朗呢對好拍檔，可以講殺晒全世界睇樣同睇實力嘅球迷，難怪會成為最受歡迎嘅球會啦！