早排去泰國日日食冰糖燕窩，大大碗平到笑，食到上癮；返到香港，一落機見到富豪機場酒店最近推出的燕窩菜式，心癮又起，急不及待要去搵紅軒符師傅教我點揀點煮，原來將燕窩配搭清淡食材去煮，又另有一番味道，何須獨沽一味食冰糖燕窩咁悶呀！
記者：趙珮倩
攝影：王文忠
示範及場地：富豪機場酒店紅軒符豪翼師傅
（22868888）
點揀靚燕窩？
雖然市面上有不同牌子的即食燕窩供應，但符師傅表示如識得揀燕窩，自己浸發一樣方便，而且品質有保證，購買時可注意以下貼士。
1.要選亁身品種，輕身，色澤要帶黃，通透有光澤，太白的話可能經過漂染。
2.燕窩纖維要一絲絲清晰可見，盞形狀整齊，條理不規則，越密越好。
3.靚燕窩會帶有一陣天然腥味，若有油炸味，可能是採用豬皮或樹膠等製成，慎防買到假貨，最好到老字號的店舖選購。
4.不同品種的燕窩需要的發浸時間不一，如一般燕盞要用暖水浸軟，然後再用大滾水滾一次，購買時宜向店員查詢。
碎燕比較爽口，適宜加入餸菜中烹調。
燕盞則較為腍滑，適合做燉湯或甜品。
符豪翼師傅
入廚年資：28年
拿手菜：各式粵菜
碧綠芙蓉燕窩翅
0hr30min
份量：1人
燕窩與魚翅的矜貴配搭，加上以菠菜茸煮成湯，食落有質感，與燕窩的爽滑十分相襯。
材料
魚翅11/2両（已發）、燕窩1両、菠菜葉2両、蛋白6隻、雞湯250毫升、薑/葱各少許、雞粉/鹽各1/4、生粉1/2茶匙、麻油少許
做法
1.先將菠菜葉灼熟，加入80毫升雞湯攪成茸備用。
2.魚翅加入薑及葱汆水，瀝亁備用。
3.將餘下的雞湯煮熱，倒入（1），下雞粉、鹽及麻油調味，加入魚翅，下蛋白及生粉埋芡，最後鋪上燕窩即成。
貼士
菠菜要徹底烚腍，打出來的菠菜茸才夠滑身。
蝦子竹笙百花燕窩卷
0hr20min
份量：1人
燕窩本身味道很淡，應選較清淡的材料同煮，蝦肉和竹笙就是最佳配搭。
材料
燕窩1両、蝦肉2両、竹笙/蘆笋各2條、蝦子少許、上湯150毫升、雞粉1/4茶匙、生粉/鹽各少許
做法
1.將蝦拍扁，灑少許鹽及生粉剁成蝦膠。
2.將竹笙開邊，鋪上蝦膠和燕窩後捲成條狀，蒸4分鐘至熟透。
3.燒熱鑊，下蘆笋炒熟伴碟。
4.將上湯加入雞粉及鹽，以生粉埋芡，淋上竹笙卷，撒上蝦子即成。
貼士
蝦膠至少要搓撻10分鐘，食落至夠彈牙。
燕窩焗西米布甸
0hr40min
（未計浸西米時間）
份量：1人
用燕窩做甜品，其實極之百搭，不論熱辣辣的焗布甸又或者軟綿綿奶凍都可以。燕窩之前可用冰糖煮入味，效果更佳。
材料
西米5錢、燕窩2錢、雞蛋1隻、吉士粉/奶粉/粟粉各2錢、牛油1両、滾水160毫升、呍呢拿油1/2茶匙
做法
1.把西米預先浸透，隔水備用。
2.將吉士粉、奶粉、粟粉及呍呢拿油加入蛋漿中；牛油溶入滾水後下西米拌勻，然後撞入蛋漿。
3.將（2）注入焗盅，以180℃焗30分鐘至表面起焦，最後鋪上燕窩即成。
貼士
西米要浸2至3小時才能完全浸透，否則怎樣焗也不能焗熟。
魚子醬鮑汁焗桶蠔
0hr15min
份量：1人
美國桶蠔的Size比本地蠔大，肉質肥美，鮮味一流，煮得太久都不會變韌，加上外國水質較亁淨，自然食得更放心。
材料
美國桶蠔1隻、魚子醬少許、鮑汁蠔油1湯匙、上湯120毫升、雞粉/鹽各1/4茶匙、生粉2湯匙、胡椒粉少許
做法
1.先將桶蠔汆水，用毛巾吸亁水後撲上生粉。
2.燒熱鑊下油，以中火將桶蠔煎至金黃。
3.調細火，下鮑汁蠔油、上湯、雞粉、鹽及胡椒粉，把桶蠔煮至收汁，最後鋪上魚子醬即可。
貼士
桶蠔一定要完全吸亁水份才可下鑊煎，煎出來的桶蠔才夠香口。