李璨琛揸車無辣不歡，揸過兩代掃把佬STi同RenaultClioV6，不畏言愛玩車片車，然而今日改揸BenzS202，貪其舒服穩定，親戚朋友都坐到。「人大咗諗嘢自然會遠啲，明白港產電影好難學以前好市時一年拍十幾套，惟有兼吓其他興趣、等好劇本。」跟手當起DJ、潮服設計，愛車卻不再為飆，只鍾意型爆外形同超高性能：「唔再鍾意飆車，所以目前DreamCar係玩Power嘅大牛龜HummerH3。」從良？無可能，璨琛一邊讚力王Hummer，一邊卻望着戰神GT-R流口水……
記者：梁美甜
攝影：譚盈傑
協力：徐影龍
力王爭霸 H3
璨琛話目前以實用性為考慮，最愛美式大牛龜Hummer，「細個睇西片見Hummer上山下海乜都得，就算成架拋起都無事，簡直萬能。「我鍾意玩Wakeboard，部車咁大架啱晒，玩XGame踩單車都掂！」咁大部唔難揸？「就係夠大隻其他車至唔敢埋嚟！不過出街搵位泊車就麻煩啲。」
咁又係，雖然H3喺Hummer系列入面算最細，但始終美國車唔係咁啱香港路面。「尤其車尾個士啤胎，遮住個後窗，要裝番個視像系統先掂。個窗同個擋風又係細咗啲，好似迫迫夾夾咁，如果大啲就好……」其實璨琛無放棄「玩」車，不過檔次同要求高咗，除等一個好劇本，及心儀導演杜琪峯合作外，同時就做吓DJ、開設時裝店Subcrew，利用生活靈感設計自己品牌衣物，一如佢手袖上繡嘅字：ThinkGloballyActLocally。人，總得宏觀啲。
供款幫你計
H3Luxury
首期：$81,800
利率：5%
月供：約$18,400（48個月）
＊以上數據僅供參考
HummerH3Luxury
引擎：3,653c.c直5DOHC
馬力：244bhp/5,600rpm
扭力：33.5kgm/4,600rpm
傳動：4前速自動波，四輪驅動
查詢：HummerHK（69031323）
完美戰神GT-R
認識Sam嘅人都知，任何車一到Sam手上都會被改裝，原因並唔係部車性能唔得，相反佢揸嘅每部車都係辣車，改車原因只係想部車更有自己Style，要與別不同：「行出街要有收視！」一講到呢部戰神GT-R，Sam更不違言：「當日去朋友度都唔知部車到咗，一知道部車喺度，一睇，嘩！型到呢，即刻上車撻匙，Feel吓佢嘈唔嘈先喇！」一如大部份人對GT-R感覺，佢嘅咆哮低沉過於斯文，唔似林寶拉利般，老遠都聽到佢嘅怒吼。會唔會心郁郁去片過呢？「𠵱家唔會囉！以前就會，仲咩罰款、扣分都試勻，𠵱家揸車最多都只係享受駕駛樂趣啫！」人總會長大成熟嘅。
專屬收視贏條街
「性能方面就唔使講一定勁……外形上都Perfect，我畀滿分！」Sam咁大個仔都係第一次畀部車滿分，唔使改裝。「同女朋友去街去威，一行出嚟已經贏晒收視喇！」偏要佢搵嘢改，佢只係要改條軨，「極其量都係改做黑軨，不過真係唔使改。原裝都已經喺石橋特製喇！」
無錯！據車行老闆指出，GT-R分三個版本，分別係基本版、BlackEdition同埋PremiumEdition。每個版本相差只係幾萬蚊，但就配套差一級。單係嗰條由石橋專為GT-R而設計嘅輪胎，都只係PremiumEdition有，而原廠防盜同Bose音響都係，識貨嘅唔使我講都知價錢喇！唔怪知得Sam邊看邊重複幾次都係嗰句：「呢個價錢真係抵玩！」聽到喇。
供款幫你計
GT-RPremiumEdition
首期：$113,800
利率：5%
月供：約$25,600（48個月）
NissanGT-RPremiumEdition
引擎：3,800c.cDOHCV6Twin-turbocharged
馬力：480hp/6,400rpm
扭力：60kgm/3,200-5,200rpm
傳動：6前速半自動波
查詢：WaldHKLtd.（28388410）