一月二十日下午八時，北京慶祝奧運倒數第二百天，香港天王歌星劉德華、台灣紅歌星周杰倫，仲有一位怕且好多人唔記得咗嘅周華健等都上京參加在奧林匹克籃球館舉行嘅慶祝活動，當然係唱吓歌啦。香港方面，唐英年司長與曾德成局長就到海洋公園參加「齊保育．愛環保」奧運倒數二百日活動，唐司長話香港必須善用餘下二百天，馬術賽預備工作進入最後階段，香港要不負國家重託云云。
東京在一九六四年辦過奧運，至今四十四年，仲未輪番到日本辦奧運，以此類推，左丁山再無機會在有生之年見到中國辦奧運，奧運馬術賽更加唔會再喺香港舉行，故此可以大膽講句，奧運馬術賽在香港進行，乃大部份香港人一生難逢一次之盛事，值得大家重視、支持。好多人鍾意鬧特區政府，可以鬧到夠，惟獨是奧運馬術賽呢回事，如果要批評，真真正正要搵道理講事實至得，要避免噏得出就噏，以免影響香港之世界聲譽，損人不利己。
奧運馬術還未開鑼，外國人已經開始批評，馬主Ｎ話有一位女士LynneO'Donnell在一本AustraliaChinaConnection（○八年一月號）發表文章，指香港之馬術場地設施由馬會投資，雖然係世界一級水準，但香港有三宗大罪：（一）空氣污染；（二）八月份氣溫太高（三十度以上）；（三）濕度太高，在香港比賽，就好似穿着整齊咁行入桑拿房。另外，香港人對奧運馬術賽提不起勁，全無熱情。
我哋香港人都知道，八月舉行馬術賽並非理想，十二月就最好，但係奧林匹克運動會在八月舉行，係由美國NBC電視台啲版權費決定嘅，與中國、英國、澳洲無關。NBC直情有權指定決賽時間，遷就美國電視黃金時間㖭，呢類金錢遊戲，歐美人士最識玩！既然每屆奧運都在酷熱的夏天舉行，全世界馬術賽騎師都好明白嘅啦，有乜好怨呀？加拿大有一份馬術界人士睇嘅DressageDaily，一月十四號就提到瑞士奧運馬術隊教練JurgenKoschel話：「大家一早就知道要去香港，正如過往去LA、阿特蘭大、漢城，氣候一樣咁熱。」言下之意，有乜好嘈吖。但點解啲人偏偏要嘈香港呢？