華華噚日喺金鐘碰見康泰旅行社老闆黃士心，黃老闆出名計仔多多，成日出新招吸客，講起今年8月北京舉行奧運會，佢即刻忍俊不禁，笑晒出嚟。
原來黃老闆最近使咗300幾萬人仔，買到300幾張奧運門票，而且大部份係決賽門票，即係欣賞完比賽，即刻睇埋升國旗頒獎嗰種，比賽項目包括港人最鍾意嘅高台跳水、游水及體操等。
度橋搶客唔炒黃牛
嘩！計起上嚟，呢幾百張飛平均每張要成萬銀，仲要係已經攞到手，可見黃老闆非常有face。早排有內地網站話，奧運門票已經有人炒黃牛，一張200蚊人仔嘅開幕式門票炒到兩萬人仔，漲價100倍。如果黃老闆攞呢批門票去炒黃牛，肯定發大達。
不過，黃老闆係做生意嘅人，正在度橋，打算8月搞北京奧運豪華團，讓團友遊北京之餘可以睇一場奧運比賽，你見啲飛都要成萬銀一張，每人團費當然要過萬啦！黃老闆話，農曆新年後先有詳情公佈，叫華華等一等咁話。