連續兩日股災，美國聯儲局局長伯南克終於忍唔住出手救全球，內地股市亦跟隨港股走勢，跌完兩日後，噚日升番啲。大陸網站《中金在線》見早兩日大陸股市咁跌法，就急不及待幫班大陸富豪計身家，睇吓跌市至禮拜二為止，佢哋賬面身家蒸發咗幾多。
大陸富豪身家縮水
先講平保（2318）董事長馬明哲，平保A股上市時，招股書話馬明哲持有1600萬股平保，以3個月前高位149.28人仔嚟計，馬總身家曾經有23.88億銀，到前日收市平保跌到落79.55人仔，馬總身家得番12.73億銀，噚日回升亦只得80.47人仔，單係A股已令佢身家縮水近半。
至於蘇寧電器喺股市連跌5日之後，前日收報63.06人仔，比起舊年10月時74.84人仔高位，跌咗超過一成半，持有29.69%蘇寧電器嘅張近東，就係咁，身家蒸發咗16億銀。
至於新希望集團董事長劉永好，持有1.77億股新希望，又揸住1.8億股民生銀行，兩間公司股價齊齊跌，令佢身家縮水近10億銀。