人稱廖太嘅創興銀行（1111）家族成員廖湯慧靄，可以話係近年樓市炒家其中一個brandname，佢同兩個細佬湯文亮同湯子亮，合作成立嘅紀惠集團，主力炒賣商廈，近排新動作係狂掃新界細屋，負責人就係佢個姪女湯振玲，亦即係湯文亮個女，會考六優生經拔尖計劃入讀科大嘅年輕才女。
湯振玲加入公司唔係好耐，今日同中原地產合作搞記招，講吓新界洋房樓市，可以講話係第一次擔大旗嘅個人騷。
第一單刁掃錦綉
湯振玲加入紀惠集團做新項目總監，第一單刁就係大手買元朗錦綉花園，前後掃咗30幾間屋，資金1.8億銀，雖然同佢姑媽廖太閒閒地一單商廈刁都幾億銀上落冇得比，不過，作為姪女第一單孭飛刁，仲要一口氣買入咁多間屋，都已經算大碼嘢。
廖太成家人都做地產，佢個仔廖偉麟03年大學畢業已經打阿媽工，𠵱家主力炒賣商廈；至於湯振玲阿哥湯振傑，喺第一太平戴維斯度做經理，曾經幫姑媽廖太，成功買入尖沙嘴中國保險大廈。