【本報訊】股神說的話，簡稱神話，到底會有幻滅的時候。有「亞洲股神」之稱的恒基地產主席李兆基本月初預言，恒指可於今年春季升至33000點。股神連日來沒有再公開「佈道」，改由長子頂上。李家傑一口氣推翻父親的預言，說連日跌市「已經預咗」，而且低處未算低，今年3月跌勢更勁。神愛世人，股神之子勸勉股民：「珍惜生命，珍愛自己。」記者：梁美寶、蔡元貴
自從今年元旦日，李兆基沒有再公開評論股市走勢。恒基公關部昨回應記者查詢時說：「四叔唔打算見人，股市方面唔會有嘢講，大仔已經講咗。」四叔長子、恒基地產副主席李家傑昨日召開記者會，介紹其慈善基金，順應記者要求，大談股災。
「𠵱家講太遲，早排我同股神（李兆基）都叫啲人唔好借錢炒股票，另一位李先生（長實主席李嘉誠）都有講，講你又唔聽，今日惟有瘋狂斬倉，都冇辦法。」現年44歲的李家大公子向來比父親低調，較少接受傳媒訪問，近期出選全國政協常委，才多了曝光。
勸勉股民：珍惜生命愛自己
記者問他港股是否已步入熊市，李家傑說：「你自己都睇到喇！」然後補充：「已經預咗，美國恐慌性拋售……每個人嘅投資策略都要量力而為，𠵱家惟有唔好被人震出局。其他唔掂嘅人惟有斬倉。」他說，美國總統布殊「諗緊計、𢱑晒頭」，全球都受美國股災殃及。
股神曾預言恒指今春可見33000點，股神之子則大唱反調：「𠵱家未係最嚴重，仲有個3月，歐洲銀行公佈業績，仲有好多負面消息未爆，到時（跌勢）仲勁呀！」然後他開始為父親瀕臨破滅的「神話」開脫，還怪責小股民急功近利：「股神每件事都睇過度過、慢慢來，先至會成功。佢有毅力，會盡力而為。但係𠵱家嘅年輕人只睇眼前利益，會搖擺，好似股市投資咁，炒出炒入。」
記者又問他，其慈善基金可會幫助水深火熱的股民一把，李家傑回應說：「我自己為基金draw咗一條line，救危不救貧。啲人瘋狂炒股，已經唔係一個人可以影響到個社會。」記者再問，如有股民因為輸身家而做儍事，他可有說話勉勵，李家傑引述其慈善基金的格言說：「珍惜生命，珍愛自己。等待生命中最燦爛嘅時刻，等到呢個peak來臨，唔好受股市影響。」
去年8月底，李兆基公開披露其「兆基財經」三年內狂賺千億的戰績，又揚言恒指可在07年底升越25000點。幾個月間，四叔一路唱好，恒指一路勁升，奠定了四叔「股神」地位，每次預測，都成為股民的金科玉律。
股神曾預測 今春上33000點
至10月底，恒指一度衝上31958歷史高位，股神再度預言說恒指聖誕後三個月內可見33000點。直至去年12月底及今年元旦，四叔仍堅持今年春季可達33000點，秋季可達36000點的預測：「2008係一個好時年，股市大豐收。」距離預言的驗證期限只有一個月，大市已跌回去年8月的水平。
城中富豪對後市態度傾向樂觀，新世界發展主席鄭裕彤相信，美國次按問題對本港經濟影響輕微，港股很快會由低位反彈，估計下半年股市會比上半年好，恒指年底有望重上30000點。他還揚言，會繼續認購新股，暫時不會減持手頭港股，但亦不會吸納。
東亞銀行主席李國寶則表示，恒指大跌超過2000點是出乎其意料之外，但不擔心熊市會來臨，他認為股市有上有落屬正常現象。
