中坑殺手湯盈盈大前日喺灣仔遇襲，俾金毛男子當街掌摑，事後佢曾淚漣漣公開遇襲始末。向來對佢疼愛有加、兼喺7年前發生過被扑頭事件嘅曾志偉，喺今個農曆年會帶佢到美加登台，演出《超級無敵2008掌門人狂歡賀歲SHOW》，等佢搵真銀過肥年，其他演出藝人仲有鍾鎮濤（阿B）、佘詩曼、陳雅倫同阮兆祥等。
Freeze知衰道歉
前晚湯盈盈喺電視城拍《師奶股神》，凌晨3點幾收工，但噚日朝早9點幾已經揸住部平治房車，載埋擒賊男助手Kelvin，去美國領事館辦簽證，其間志偉、阿B同TVB監製錢國偉都出現，湯盈盈一見志偉都唔知幾咁開心，不停咬耳仔，仲笑容滿臉㖭。
12點志偉同湯盈盈就各自離開，湯盈盈去灣仔鷹君中心開登台會，佢話新春會去拉斯維加斯做騷，舊年湯盈盈有派開工利是，今年唔知佢仲會唔會繼續派利是？佢就話：「今年冇啦，啲利是封用晒啦。」佢出事嗰日曾經駐足街頭睇利是封，睇嚟為免勾起傷心回憶，都係無謂派咯。
此外，整容三嬌Freeze前日多口話湯盈盈「係得罪人至會憎到俾人打」，噚日三嬌嘅師姐吳文忻都話佢哋離晒譜，公司會教訓佢哋，話咁快三嬌就發表聲明補鑊，直認對問題回應不恰當，如果對湯盈盈構成傷害，佢哋願意以誠懇態度致歉。