好多人覺得香港人只會向錢看，缺乏創意，不過噚日一年一度嘅香港工商業獎公佈07年度結果，華華見到香港廠家設計嘅產品，直情有啲似《國產凌凌漆》裏面星爺啲法寶一樣咁神奇。
好似一個由保力遠東設計嘅全天候數碼攝錄電筒，淨睇個名就知個電筒有料到，仲攞到消費產品設計大獎。據保力助理董事王君漢介紹，個電筒附有隱蔽式鏡頭，可以暗中攝錄相片同錄像，內置LCD紅外線燈，唔需要開燈一樣可以進行攝錄，最適合夜間巡邏嘅警察同保安員用；出廠價150美元，舊年首次推出海外市場，反應已經相當理想，接到幾萬部定單，家陣初步同本港警方接洽。
另外生產力及品質大獎由晶門科技（2878）奪得，行政總裁梁廣偉介紹嘅一副視像眼鏡，將IC半導體產品應用喺最新電子消費產品。呢款價值超過299蚊美金嘅視像眼鏡，可以將儲存喺iPod嘅影像，傳輸去眼鏡欣賞，效果好似睇緊40吋大電視，好處係可以享受好私人嘅娛樂，又唔怕騷擾人，最啱喺飛機用。