傳統賀年食物，少不了年糕，愛吃其甜美煙韌口感。有Heart的糕餅師傅，深明香港人嘴刁，將糕扮鬼扮馬，點金箔、加鮑魚，讓年糕增添豪華美。今年更創出變種又新式的賀年糕點，芝士年糕十足蛋糕般，當南瓜遇上素翅，又另番景象，有心整色整水的糕點，最Buy邊款？
記者：郭佩韻
攝影：梁細權
Model：Alice、Kin、JoWai@StageModels
蛋糕布甸扮年糕
一講年糕，通常想起甜甜、煙韌的年糕，今時今日的年糕已經再唔係啡或白色！好似專玩Fusion菜式的亮明居，創出金箔千層芝士年糕，賣相似蛋糕，但不失傳統風味，的確令人有新驚喜，另有天與地的蘆薈楊枝甘露糕，凍食似布甸多過年糕，絕對啱年輕人口味。
1.金箔千層芝士年糕$380（a）
芝士蛋糕外層，糕面以藍莓醬畫花，再綴以金箔，內裏夾心為粵式年糕和以菠菜汁、合桃及糯米粉製成的川式桃仁甜板，還有糖冬瓜及亁果粒，千層口感，一糕滿足多個願望。
2.南瓜素翅糕$80（c）
年糕甜度高，這款年糕用新鮮南瓜製成，營養價值高，加入素翅，豐富口感，特濃南瓜味，甜度適中。
3.金枕榴槤奶凍糕$72（f）
打開盒蓋，成間屋充斥着榴槤味，要是對榴槤情有獨鍾，必愛這糕。超濃榴槤味，凍吃質感滑溜，如吃雪糕般。
4.蒜香芝味煙肉糕$59（f）
賣相唔算太靚，芝味煙肉以為只有Pizza先夾，味道雖然唔及Pizza，但頗香口兼很有新鮮感。
5.蘆薈楊枝甘露糕$68（h）
凍食糕點，有齊芒果、西柚及蘆薈肉，甜甜的，無論質感及味道，與芒果布甸無異！
變種年糕夠出位
大敵當前，傳統年糕也不甘示弱，求變應戰，諸如桂花紅豆糕，令人又愛又恨。至於蘿蔔糕，賣相較難變，但加入矜貴的黑松露菌、鮑魚，貴少少也值得豪一豪。
6.桂花三色紅豆糕$78（d）
三色年糕上層為杞子桂花，中層為椰汁，再以紅豆做底，紅豆椰汁味強，亦不失杞子甘香。於1月31日前訂購可享9折優惠。
7.黑松露菌鮑魚蘿蔔糕$228/6件（b）
時令菌黑松露味道獨特，再豪一點，在蘿蔔糕內加入鮑魚及蝦子，想不到鮮味鮑魚配黑松露竟然咁合拍。只限堂食。
8.素蘿蔔糕$53（g）
蘿蔔糕通常有臘腸、冬菇等，改頭換面變成粟米粒及雞髀菇等，清清淡淡，比大啖肉更可口。
9.蓮藕甘笋馬蹄糕$52（e）
加入蓮藕甘笋於馬蹄糕內，有益健康，三種蔬果味配合得宜，夠生津清潤。
10.山芋千絲糕$88（c）
用芋頭絲製成芋頭糕，賣相特別，但將之切成塊狀落鑊煎，有難度，一不小心芋頭糕變成芋絲。
11.咖啡年糕$68（h）
用上等巴西咖啡粉製成，用文火煎香，散發着陣陣咖啡香，咬落煙韌，咖啡味濃，甜味適中。
（a）亮明居（23933933）
（b）洲際酒店（23132323）
（c）鴻星（26280080）
（d）逸東酒店逸東軒（27101093）
（e）蛋撻王（27900990）
（f）大班麵包西餅（23513222）
（g）聖安娜餅屋（28730832）
（h）天與地（25378083）