我哋住在香港，久而不知其好處。泰國來客阿篤第一次訪港，對香港留下深刻印象，讚不絕口。佢哋在泰國參加旅行團套餐，原來包括澳門遊，在赤鱲角機場落機後，先去喜來登擺低行李就坐船過澳門，住在一間離市區甚遠嘅三星酒店住一晚，次日坐旅遊巴環遊澳門，參觀賭場，晚上六時乘船回港，先至到喜來登checkin上房，此之謂「澳港四晚五天遊」。澳門新賭場陸續開幕後，對外國遊客吸引力甚大，阿篤嘅弟婦來港不是旅遊，而係參加ACNielsen嘅「品牌工作坊」，弟婦話一啲參加者特登在下午五時半工作坊完畢後，趕六點半船去澳門，午夜回港，目的就係參觀「威尼斯人」，「MGM」與「永利」賭場，可見澳門已成為亞洲遊客必定探訪的景點，但只限於一日左右，旅遊主題仍然係香港。
一月十八日《國際先驅論壇報》頭版報道澳門於二○○七年嘅賭博金額高達一百零四億美元，已超越拉斯維加斯成為世界最大賭城，在二○○八年更會超越整個內華達州。澳門咁鬼好景，將令美式賭場與賭王何鴻燊嘅競爭更激烈化。
數字就點出一片好景，但實在情況就好慘烈，澳門客M走嚟飲茶，對我哋班老友講，澳門一啲賭廳情況暗湧，以前回佣一點二，𠵱家有啲提高到回佣一點三五，賭廳承辦人冇啖好食，只望賭客加大賭注。佢與公子L都聽聞，近月澳門出現一位元朗賭神，男士，年紀不大，據說憑揸住五十萬元過澳門，專賭百家樂，屢賭屢勝，至今贏錢過億，縱橫各大賭場，至日前為止，殺到啲賭場片甲不留。究竟呢位傳說中來自元朗嘅賭神係何許人也，澳門M與公子L都未見過，只係聽到賭場人士耳語。賭場嘅宗旨素來係不怕你精，不怕你呆，最怕你不來，又睇吓「元朗賭神」最後是否見好即收或是獵狗終須山上喪。澳門賭廳有不少大客，一、二百萬一鋪不放在眼內，最麻煩嘅係佢哋多數來自內地，輸咗要收數！澳門M話：「大陸客好大方㗎，歡迎放數人隨時上大陸收數。只係冇乜人敢上去收錢啫！」