宮崎葵前日同岡田准一出席新片《向著陰天盛放》試映會。佢最近同堀北真希合作日本NHK電視台嘅古裝大河劇《篤姬》，雖然堀北曾經喺訪問度講過好欣賞阿葵，但係據噚日出版嘅《周刊女性》報道，佢哋兩個人其實好唔妥。有位髮型師爆料話阿葵喺行內人緣麻麻，而堀北就好倔強，阿葵直情唔想同堀北一齊開工，不過，阿葵所屬嘅事務所就否認二人不和，仲話佢哋根本冇同場演出戲份喎。