陳、黃、李師奶約開枱！仲玩埋全電動Hi-Tech麻雀枱！OhNo，十幾年「洗牌叠」手作仔完全被封殺，摸牌上手仲無啦啦走粒飯出嚟黏住隻5筒？仲要熱嘅㖭！「最新魔術樓梯豪華版，有暖風功能吹住啲牌，唔只粒飯暖笠笠，天寒地凍仲FeelSoGood㖭……」啪！
記者：朱崇德
攝影：王文忠
麻雀Size似廣東牌
屋企仲用緊霉到發黃爛麻雀，配張朝行晚拆小摺枱？大志啲啦！自動洗牌麻雀機大大話話出咗16年，想當年初代要成5、6萬一部，𠵱家最豪版都唔使一半價錢；唔好以為齋明星及城中名人先可擁有，據店舖負責人表示：「其實有三成幾訂貨係公屋及屋苑，好多時都係啲孝順仔女，買畀老人家……游十幾圈亁水，重複洗牌動作好易勞損嘛！」
呢類機多數用台、日式較細號麻雀牌；今次魔術樓梯版使用了差不多廣東麻雀Size，18張牌排出來，比日、台版長咗1隻有多，相對字粒亦大咗，老人家都睇得方便啲吖！
機械洗牌靜音1倍
魔術樓梯版另一改進地方，係將洗牌時間由以往90秒銳減到50零秒！配合機身使用最新ABS合成樹脂製成一體成型外殼，明顯將機內洗牌聲浪減少一半，加埋洗牌夠快，打通宵麻雀都唔驚嘈醒隔籬房個BB！機身內置暖風功能，當濕度高於65%就自動開啓；遇着有雀友輸上十幾底出晒手汗，㩒個「除濕」掣開啓，副牌出嚟Warm到爆！機身內置256MB記憶體，可聽MP3，遇着啲站長即刻醒佢一首《行快啲啦》，相信幾有效。
平近半慳位摺枱版
驚屋企唔夠地方裝部「樓梯」機？今個星期仲新返咗隻「摺合式08特別版」！基本功能同一般舊式自動洗牌麻雀機一樣，玩垂直升降，亦冇附加「樓梯」機先進功能，機價$14,888（12個月免息供$1,324），最方便係有摺合式功能，朝行晚拆都得！
超爆樓梯洗排叠
自動洗牌麻雀機出咗咁多年，一直都係玩垂直升降，今次新樓梯豪華版創新玩「火車捐山窿」，絕對係首次！好處係可以透過IC卡玩軟件升級，除最傳統144張牌外，你想定2人麻雀打少番子、萬子又得，玩加拿大麻雀加多8字皇牌亦得（共148隻）。
Step1
先將打完嘅麻雀，推入枱中央的洞內。
Step2
預有兩副麻雀，一庫打、一庫StandBy。
Step3
枱面四條斜放麻雀溝，會邊高邊低降下。
Step4
麻雀出晒，鋼板枱面機關會關上，開枱！
雀友點睇
火車捐山窿出牌，好有氣勢！牌數可自定？啱晒唔同人打法。
啲牌大大隻似廣東麻雀，$2,268可以12個月免息供機？我都想買。
洗牌真係好靜，打通宵真係唔會嘈到隔籬！
JCShop（31022783）