港股噚日好似食咗瀉藥，喺《香港討論區》，有散戶網友做咗個調查，問究竟係噚日股災恐怖啲，抑或97股災較得人驚，成晚有65%嘅網友投票話97股災最恐怖，只有17%認為噚日恐怖啲。
Healchu諗番97股災，都猶有餘悸話：「97嗰時，貨幣危機加樓市泡沫，直到98年政府打贏大鱷先好番啲。」Terrylun亦話：「97時係冇得沽，只有望住跌。」Moneystock插口：「嗰陣時啲股票，可以冇成交，想賤賣都冇得走，𠵱家都仲有好多買盤。」
Blackcat就好黑仔，佢話：「單睇呢兩日其實唔算太恐怖，97嗰轉真係成個人都心慌慌，嚇到我07年中先玩番股票，但可惜半年唔到又嚟跌市。」
已驚到麻木
但網友返工炒股票唔同意，「今次慘啲噃，日日裂口低開，根本冇得走。」Bergie亦話：「今次冇咩人識驚，或者已驚到麻木？咁先至恐怖。」Nestse就大唱反調，佢話：「論恐怖，點講都係87股災。」越講越遠，好彩未有人講到70年代。