創興銀行（1111）家族成員廖湯慧靄嘅姪女，湯振玲Jacqueline加入家族公司紀惠集團之後，噚日首次以紀惠新項目總監身份，同中原地產嘅高層見傳媒。有靚女在場，華華即去捧場，見佢單拖做紀惠代表，表現淡定自然，小妮子出道唔算耐，仲係「新鮮人」，所以講嘢都率直啲。
華華見佢淨係帶個助手到場，完全冇架子，雖然喺拔尖計劃入讀科大時，都接受過好多傳媒訪問，唔係第一次同傳媒交手，但佢噚日同華華講：「好緊張，啲記者嘅問題好尖銳。」
喺公司唔叫爹哋
咁佢阿爸湯文亮同姑媽廖太有冇過兩招，教佢應付傳媒嘅心得呢？Jacqueline話：「冇呀，不過有Angus（中原營業董事許偉邦）喺度，佢唔會畀人蝦我嘅。」
Jacqueline06年科大畢業後，就加入巴克萊亞洲投資部門，年薪60萬銀，最近由投資銀行轉做地產。雖然系出名門，但話晒一出道就年薪60萬，返家族公司有幾多人工先？佢笑笑口答話：「冇計啦，家族生意嘛！」雖然話屋企生意冇計咋，但Jacqueline唔係嗰啲公私不分嘅人，好似佢成日提住「爹哋」，但喺公司就會叫番「大湯生」。
佢仲同華華講，巴克萊份工最吸引嘅梗係份人工啦，但當時只係做兵仔，冇乜會要開，少見世面，𠵱家就見多啲人，睇多啲嘢，又話喺大學讀書同做投資銀行時學到嘅嘢，好似息口、外滙、美市，同埋環球經濟，對佢𠵱家分析樓市都好有用。