玖龍紙業（2689）主席張茵呢排力托玖紙股價，噚日先提到佢上個禮拜出份通告，想刺激股價，跟住就見佢親身上陣。
投資者唔buy
噚日特登搞個記者會，同大家分享佢對集團以至成個造紙業嘅前景睇法。唔知係唔係華華心多，抑或張主席較為肉緊，全程張主席都非常激動，搞到華華以為去錯咗記者會㖭！
一坐低，張主席係咁講新項目有幾好，點樣可以帶動玖紙整體表現，臨尾仲要補多句，半年內會再有大收購㖭！簡直有背景、又有前景，唔買就走寶咁滯！
鬼咩，同歷史高位26.75蚊比，𠵱家玖紙個股價跌咗超過52%，作為領導人，梗係要做吓超級sales啦！
咁結果呢？噚日玖紙再跌多8.43%，收報12.82蚊，睇嚟啲投資者唔係好buy張主席嘅講話。
古語有云，傾巢之下，豈有完卵，張女王又何必咁動氣呢？