上個禮拜五，孫柏文為大家提供咗張恒指三年走勢圖。大家如果有睇到，都會見到恒指喺呢三年嚟，每次下試200日平均線時，都會見底同嚟一次大力反彈。
咁上個禮拜五，反彈力真係有，由最低到最高位反彈成千點。
最弊係，當日反彈力用晒喺修補嗰日成千點嘅低開裂口。禮拜五個市埋單只升80點。
政府做嘢非好事
如果大家不問世事，分分鐘會覺得噚日一定可以承接禮拜五個勢，繼續升。點知禮拜五晚，花旗國國會同總統布殊，宣佈「救市」方案嘅大方向，就係咁，為噚日全球股市埋下大跌伏線。
大家可能會問：「政府宣佈會『做啲嘢』救市，唔係件好事咩？」如果你覺得政府「做啲嘢」就自自然然係件好事，相信你絕對有資格去做特區立法會議員。不過股市呢啲現實世界，我就建議你千祈唔好行埋去。
作為《金手指》嘅fan屎，你哋明白今時今日最大危機，就係呢幾年嚟用開嘅信貸分配系統，完全停頓。因為一向用開控制風險嘅板斧，全部係錯嘅。如果經濟體系就係身體，錢就係血液，而各大金融機構衍生出嚟嘅信貸分配系統，就係心臟。
心臟有事醫對腳
即係話，呢一刻個病係心臟病。咁布殊同啲國會議員有乜反應？「為醫好呢個病，政府會非常果斷咁醫。醫嘅方法就係買好多藥油嚟捽腳！」冇料就唔使講，最大問題就係心臟問題呀大佬！關隻腳乜事？佢哋連邊度有事都唔知，仲唔嚇死人？
當然，上個禮拜五晚除咗有花旗政府敗露無能之外，仲有花旗國最大債券保險公司Ambac被判處死，拖累股市。點判、點死、點累市？聽日再講。
金手指網誌： http://phatdat.blogspot.com