湯盈盈前日在街頭遭金毛漢襲擊掌摑，身心飽受創傷之際，整容三嬌Freeze卻大講風凉話。前晚Freeze出席晚宴時被問到對湯盈盈遇襲事件的看法時，竟直指：「係得罪人至會憎到俾人打。」至於01年曾遭5名大漢掌摑的梁思浩，昨日則以過來人身份表示，若事件並非想像中簡單，便應向警方求助。
由整容三嬌甄穎珊、陳樂榣及石詠莉組成的女子組合Freeze、吳文忻及陳煒等，前晚在旺角出席變靚D團年晚宴，提到湯盈盈前日在街頭遭掌摑，問Freeze可擔心遇上同樣事情時，Freeze說：「唔怕，我哋都冇得罪人，冇做過傷害人嘅事，最多俾人鬧同性騷擾。」其後甄穎珊又忽然爆出一句：「係得罪人至會憎到俾人打。」在旁的陳樂榣也附和說：「一定係得罪咗人先至俾人打啦。」
過來人提醒
「要叫警方嚟幫忙」
問甄穎珊是否指湯盈盈得罪人時，雖然甄穎珊表示不敢發表意見，但卻語帶雙關地說：「我哋行出街，啲人淨係叫我哋簽名同影相，讚我哋真人靚過上鏡。」
另一方面，梁思浩01年曾遭5名大漢掌摑，事後獲警方貼身保護，對於湯盈盈被摑事件，梁思浩昨日在電話中說：「如果件事係誤會，當然希望佢盡快忘記，心情盡快平復，但如果唔係簡單，就要叫警方嚟幫忙。我諗唔單止係藝人，就算普通市民都要提高警覺。如果盈盈有需要幫忙，可以打電話畀我，因為我自己處理過，或者可以畀到啲意見。」問他當年被摑後有否留下陰影？梁思浩說：「自己一早忘記晒，只係畀心機做嘢，因為我有一年時間有警方保護，又點會擔心呢？」
此外，商天娥昨日在九龍灣街頭繼續拍攝無綫劇集《師奶股神》，前日湯盈盈在灣仔遇襲前，娥姐正與湯盈盈齊為該劇開工，二人更與工作人員一起午膳，不過盈盈被襲時娥姐不在現場。
娥姐讚盈盈
「唔係寸同囂嘅人」
娥姐昨日說：「盈盈本來已經收工，但就同我哋一齊去食飯，食完飯我去銀行㩒機攞錢，所以睇唔到佢俾人打，我眼同耳八卦，但口唔八，唔會去問佢發生乜嘢事，我又唔係同佢好熟，唔知人哋鍾唔鍾意我代佢發言呢！不過我覺得盈盈為人都好funny，唔係寸同囂嘅人，最多都係唔出聲，唔同我唔高興會板起塊面。」
昨晚娥姐返無綫拍攝《師》劇廠景，透露前晚與湯盈盈一起開工時見她心情OK，對於Freeze暗寸湯盈盈因得罪人被打，娥姐不屑地說：「Freeze？乜嚟㗎？未聽過。」被告之Freeze是歌手時，娥姐說：「我以為佢哋係整容組合。」問她對Freeze之言有何意見？娥姐說：「點可以咁講嘢，唔可以咁代表人講，唉，真係有經歷同冇經歷嘅人講嘢係唔同。」
採訪、攝影：魯萍、仇志德
一網講盡：網友譴責暴行
湯盈盈街頭遇襲一事震驚整個娛樂圈，大批網友也在討論區上議論紛紛。
p-i-g：我覺得好恐怖，一定嚇死佢，拉咗個金毛飛冇？
o0air0o：真係慘，冇啦啦俾人打，真係嚇死佢。
ckayiu531：條友會唔會係討厭湯盈盈飾演的角色，所以討厭佢呀？
Xiues：為乜嘢事都唔應該用暴力解決，好彩拉到條友啫！
lkopeter：見佢眼濕濕都有啲戥佢難過……
資料來源：香港討論區
圈外男伴團團轉
湯盈盈95年入行以來，走性感路線的她緋聞也不少，自去年宣佈跟拍拖5年的圈外男友分手後，身邊更出現不少男伴。
人物：周星馳
簡介：初出道時因與周星馳在夜店飲酒唱K，而知名度大增。
人物：陳豪
簡介：06年5月有指陳豪夜訪湯盈盈的住所而傳出緋聞，湯盈盈以笑否認。
人物：圈外男友
簡介：湯盈盈去年3月自爆跟拍拖5年的圈外男友分手，還為君剪去長髮。
人物：西裝男
簡介：去年10月在台北拍攝無綫節目後，相約友人到夜店狂歡，湯盈盈之後與一西裝男士坐的士返酒店，還以法式goodbyekiss道別。
人物：四眼中坑
簡介：去年11月被拍得跟一名戴眼鏡的中年男士行街，事後湯盈盈聲稱該男士的妻子當日都有在場。
資料來源：《蘋果》資料室