智富能源（1051）主席黃金富舊年開記招公告天下，話要拎680億銀出嚟收購電盈（008）。噚日智富能源喺就嚟清拆嘅中環麗嘉酒店搞咗個推介會，介紹吓佢哋有意收購51%權益嘅蒙古煤礦項目，華華即時捉住黃金富，想睇吓佢仲有冇鯨吞電盈狂想曲嘅下文。
前後左右走勻全場
點知華華一行埋去提到「電盈」兩個字，黃金富就不停咁講「遲啲、遲啲」，咁究竟遲啲先講，定係遲啲都冇嘢講呢？
佢老人家為咗避開華華嘅追問，由場地嘅前面走到後面，然後由後面行去左面，走嚟走去，始終都係笑而不答。
唔講電盈，都可以問吓嗰個又係位於蒙古、煤礦儲量有成28億噸嘅大型項目啩？
點知黃金富淨係話，自己喺兩個禮拜前到蒙古參觀過吓，其他詳情就要問番公司，唔通佢老人家去到蒙古，仍然心繫電盈，搞到乜都唔記得晒？