港股噚日急瀉超過1300點，黃大仙劉小姐溝咗貨增持國壽（2628），33.3蚊買入。國壽噚日最低見32.7蚊，收報32.85蚊，跌9.5%。劉小姐好擔心咁問：「今日見到國壽跌咁多，諗住差唔多見底，咪晏晝加碼溝淡，但家陣股價仲不斷咁跌，國壽係咪好唔掂呀？」
主持楊慧玲（Teresa）唔贊成劉小姐溝貨，「𠵱家國壽仲企喺250天牛熊線（現處32.5蚊左右）樓上，一旦國壽跌穿呢個價，就會跌得好急，慢吓手好似今日恒指咁跌法。」
蟹貨纍纍沽壓大
法巴零售衍生產品部董事翁世權亦話：「國壽短期弱勢已成，𠵱家睇支持位冇乜意思，因為整體個市都落緊，今日晏晝唔少人都喺低位撈貨，越跌越買call輪，但家陣咁嘅市況，逆市撈底，唔係太理智，就算國壽有機會反彈，亦會面對唔少蟹貨沽壓。」
翁世權建議，國壽至少升夠3至4日，先好諗住再入市。
股價殘未必吸引
另一主持孫柏文於是問劉小姐：「你之前嗰啲國壽，喺乜嘢價位買？」劉小姐話：「50幾蚊高追，咁先至諗住溝淡。」
Teresa補充：「今日睇到個現象，唔少基金都好似清緊倉，好多大藍籌同基金愛股都係咁跌，千祈唔好諗住佢哋咁跌法，股價好殘好吸引，要小心。」
中國財險（2328）
純粹博短炒
大埔關公推介中國財險（2328）同玖龍紙業（2689），佢噚日率先喺8.99蚊買入財險，睇12蚊，8.3蚊止蝕，純粹短炒。
孫柏文話：「大陸都有消息話，銀行可能喺次按有問題，好多大陸金融股都睇唔透，財險跌勢一浪低過一浪，點買先？」關公就解釋，「唔係同佢做人世，我唔會長揸，我定12蚊都唔算貪心，諗住搵番杯咖啡錢囉。」孫柏文話呢隻冇乜防守，以呢個勢嚟講算係貪心，提議佢嚴守止蝕。
另外，關公用「超抵買」嚟形容玖紙，仲建議13蚊買入，目標價15蚊，12.3蚊止蝕，同屬短炒。孫柏文提醒佢：「玖紙已經返去06年個位，美國嗰邊經濟唔好，廢紙回收價會平好多。」
關公個案
中國財險（2328）
買入價：$8.99 目標價：$12
止蝕價：$8.30 時間：短炒
玖龍紙業（2689）
買入價：$13 目標價：$15
止蝕價：$12.3 時間：短炒
中石油（857）
撈貨博反彈
尖沙嘴溫小姐推介中石油（857），佢話：「中石油由20蚊跌落嚟，足足唔見咗成四成四，家陣低位撈貨，可以博反彈。」佢建議11蚊買入，揸3個月，目標價13蚊，睇反彈18%。中石油噚日一度低見11.12蚊，收報11.3蚊，跌8.4%。
翁世權好奇問：「溫小姐，你話中石油跌到咁低，係用乜嘢嚟衡量先？」溫小姐話：「由20蚊跌落嚟，咁都唔算低？」翁世權再追問：「但有好多股票都由之前嘅高位跌咗落嚟噃，唔代表佢哋唔會再跌㗎，你千祈唔好諗之前跌咗幾多，就估佢會升幾多。其實，中石油家陣積咗唔少蟹貨，13蚊面對唔少沽壓，一隻股票有冇V形反彈，要有好多因素配合，現時中石油係弱勢，入市要冒唔少風險。」孫柏文建議到10蚊先考慮。
溫小姐問：「可唔可買中石油嘅put輪？」翁世權表示：「put輪選擇唔多，多數係短炒投資者玩，可以等出新輪，行使價會低啲。」
溫小姐建議
建議買入價：$11 目標價：$13
止蝕價：$10 時間：3個月
中交建（1800）
驚輪商掟貨
西貢黃生認為個市咁波動，可以吼中國交通建設（1800），建議17.5蚊入，睇24蚊，15.5蚊止蝕，短炒三個月。孫柏文話黃生個建議都fair，20蚊係好大嘅支持位。中交建噚日跟隨大市跌2.2%，收報19.9蚊。翁世權提醒黃生：「08年炒基建概念，中交建要落番17.5蚊未必得，要睇番係急落定慢慢落，𠵱家個市抽起又掟過，可以等佢打咗個底先再撈。」
黃生擔心中交建嘅窩輪會影響正股，「好concern啲輪商見到個價就出貨。」翁世權就話：「中鐵（390）出輪，就話係個輪帶動升，到中石油（857）出輪，就話係個輪令佢跌，要留意番個影響係好定係壞，中交建嘅輪算係多，亦曾經係熱門認購證，唔算離個頂位好遠。」
黃先生建議
建議買入價：$17.5 目標價：$24
止蝕價：$15.5 時間：3個月
恒豐金業（870）
睇好金價升
西環David推介恒豐金業（870），原因係睇好金價，佢話：「之前佢賣咗金馬車，都升咗咁多，佢仲有咁多金觀音、金廁所，如果遲啲金價一升，我諗佢又會炒番上嚟。」翁世權話：「近排商品價格幾波動，雖然大勢都係上緊，但都要小心短期回落。」孫柏文就話：「我覺得呢間公司管理層嘅管理質素，有少少不明朗。」
David話：「我諗住兩蚊入，𠵱家金價（每盎斯）879美金左右，有機會落番去850蚊，到時隻股有機會落番去兩蚊左右。」不過噚日恒豐金就逆市升成8.7%，收2.25蚊。孫柏文問：「金礦股跌，點解恒豐金會升？」David話：「金礦股主要係大陸嘅股，大陸股跌，紫金（2899）、招金（1818）都一定跟住落，反而呢隻受呢啲影響因素較小，本土因素濃厚啲，市值又細，比起大陸嗰幾隻金礦股隱陣啲。」
David建議
建議買入價：$2 目標價：$2.8
止蝕價：$1.8 時間：半個月
今日嘉賓：亨達集團研究部董事黃敏碩
每日收市後4:30pm
歡迎Phonein28698262
http://finance.appledaily.com
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，
登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
