一向牙擦擦的蘇民峰（Peter），去完環遊世界，最近又有新搞作，聯同女友Lilian一齊出版食譜。平日揸羅庚就掂，揸鑊鏟又掂唔掂？「我隔個月就去一次旅行，走勻全世界，食盡米芝蓮三星級餐廳，煮得掂唔掂，我一食就知。學煮餸我係無師自通，望兩望食兩啖就知點煮……」真係咁勁？一於踩入他的汀九大宅，試試他的蘇家家常菜。
記者：黃潔蓮
攝影：楊錦文
示範：蘇民峰
嘴刁練得好廚藝
蘇民峰小學時代已要幫屋企執柴煮飯，煮餸也是那時候學起。最近重拾鑊鏟，原因是他覺得坊間的餐廳水準越來越差，「在香港食的西餐大部份都唔掂，中餐還可以，但我試過在一家川菜館吃過一道水煮龍蝦，卻用了波士頓龍蝦來做，醬汁不入味，跟原本用小龍蝦做根本兩回事。我食盡好嘢，呃唔到我。」
出外食一次即識煮
蘇師傅與女友Lilian平日最愛四圍吃，每年一度巴黎之旅，就會特地預約米芝蓮三星餐廳來大快朵頤。吃得好嘢多自然變得嘴刁，而且味覺也變得敏銳起來，只消吃一次，那種味道就會深印腦海中，回家就可以煮出一樣的味道來。由他「發明」的包括蘇家元蹄，女友Lilian則發明了洋葱排骨，在餐廳吃過而照住做的有羅定豆豉雞和冬茸羮。這次與女友一起出書只是一個試金石，他正游說女友開家「蘇家私房菜」，把他的心水美食發揚光大。
羅定豆豉雞
4人份量
30分鐘
這道菜是蘇師傅從新兜記偷師學來，酒家結業，冇得再品嚐，惟有自學，保留這種味道。他說：「這味餸最重要是最後灒酒，能把香味由底浸出來。」
材料
雞全翼5隻、豆豉1両、指天椒1隻、米酒1/2湯
醃料：生抽/老抽各1湯匙、糖2茶匙、鹽1/2茶匙、油1茶匙
做法
1.雞翼斬件後，加醃料醃15分鐘。
2.燒熱1杯油，放入雞翼以半煎炸方法炸至金黃熟透，盛起備用。
3.豆豉洗淨瀝亁水，與切碎的指天椒一起放進燒滾半杯油的鑊中爆香。
4.放入雞翼同炒勻，讓雞翼均勻沾上豆豉，然後灒酒即成。
貼士
豆豉要爆到亁身有焦香才可達到最佳效果。
火腿冬瓜粒湯
6人份量
40分鐘
似上海菜冬茸羮，利用火腿來吊味，鹹鮮有餘，連鹽也不用加。不過蘇師傅把它改良過來，把冬瓜和火腿切到粒粒幼細，食入口更有口感。
材料
冬瓜1斤、金華火腿/瘦肉各4両、水2公升
做法
1.先將冬瓜、火腿及瘦肉切成小粒狀。
2.燒滾水後，放入冬瓜粒、火腿粒及瘦肉粒，大火煮滾後轉細火熬半小時即成。
貼士
火腿最好選用豬肘子肉，會較鮮味而不肥膩。
蘇家元蹄
6人份量
2小時15分鐘
蘇師傅愛吃元蹄，但又不愛坊間吃到那種腍到爛、味很甜的做法，於是自己膽粗粗用生抽、老抽、冰糖去燜，出來效果又非常好味，自此成為他的招牌菜。
材料
元蹄1隻、米酒1湯匙、冰糖1両、蒜頭5粒、辣椒2隻、生抽/老抽各1/2杯、水/鹽各適量
做法
1.元蹄洗淨後抹亁水，放入鑊中用少許油煎至四邊焦黃。
2.加入生抽、老抽、米酒、蒜頭及辣椒，然後注入清水蓋過元蹄，以大火煮滾。
3.加入冰糖及鹽調味，轉細火燜2小時至腍即成。
貼士
元蹄要連中間的骨，否則燜得耐會變腍，似煲湯豬肉。而且在燜煮途中要不斷試味，調出理想味道來。
洋葱排骨
4人份量
30分鐘
這味洋葱排骨是Lilian自創的菜式，她說這道菜有點像台灣菜，所需材料很簡單，但又很惹味，每次煮這道菜都不期然多吃兩碗飯。
材料
腩排10両、米酒1/2湯匙、洋葱1個、生抽1湯匙、糖2湯匙
做法
1.洋葱去皮，切圈備用。
2.燒熱鑊，加少許油，炒香腩排至表面金黃。
3.加入洋葱圈及其他調味料炒勻，然後冚蓋煮15分鐘左右至洋葱軟腍即成。
貼士
洋葱不用切得太碎，切成一圈圈，在燜到腍爛時還保留一點口感。