財務L呢輪好識嘆，與老婆去完澳門兩日，住在「永利」酒店豪華套房，佢話舒服到冇得彈，勝過住「威尼斯人」。佢話「威尼斯人」房間大則大矣，但豪華舒適程度與永利都係差一皮。跟住兩公婆又靜靜雞去咗吉隆坡三晚四日，住在KLCC隔籬嘅文華東方酒店。觀感如何呢？財務L話：「十幾年來第一次去吉隆坡，諗唔到物價咁便宜，感覺上只係新加坡一半，而廣東菜仲好過新加坡，加上通街講廣東話，如身在香港，KLCC商場不比其他大城市嘅大商場遜色，面積龐大，行都有排行。吉隆坡好值得去，食到真正海南雞飯已經夠過癮啦。」
公子L深然此說，佢話新加坡因早已禁止活雞屠宰，全市食冰鮮雞，新加坡已無靚海南雞飯，去到唔使周圍搵。公子L更加鍾意去檳城，公子L話：「檳城有好多古舊建築物，外貌維持，內裏就有現代裝修，最係吸引歐洲遊客。兼且檳城物價便宜到極，民風淳過吉隆坡，又有陽光海灘，總之係正。如果你係福建人，去檳城講福建話，通晒。」
俾公子L講到心郁郁，吉隆坡就去得多，檳城幾時去過呢？諗諗吓，好似已係十五六年前。發夢去旅行之時，突接電話，曼谷朋友D來電，話佢太太、外母與佢家姐到咗澳門，即將到港，請幫手睇住。朋友D兩個家姐，姊弟三人之小名分別係Tuk、Tik、Tok，用廣番話翻譯就為「篤、的、dog」，好易記，「篤」係藥劑師，「的」係醫生，「dog」係工業工程師，三人極少訪港，左丁山聞訊當然立即撲去尖沙嘴喜來登請阿篤三人組吃晚飯。靈機一觸，帶佢地去美麗華「東宮」，叫咗一個椰青燉翅，阿篤見到，問係乜，左丁山開玩笑同佢講：「南勿拋」（泰文：椰青水），阿篤望清楚，見到好多翅，笑不可支，與弟婦及弟婦阿媽食到津津有味，點甜品之時，左丁山請經理去「西宮」（西餐廳）點「梳乎厘」，嘩，三位人客話從未食過咁好食嘅甜品，位老人家之後更加講足三日。左丁山當然冇法子日日陪住佢哋，阿篤臨去機場之時，打電話嚟講拜拜，盛讚香港好熱鬧，好好玩，好好食，街頭充滿活力，尖沙嘴銅鑼灣令佢難忘，以後唔去新加坡咯，有機會就嚟香港。