港股昨日認真唔生性，真係大裂口低開再整支大陰燭，恒指挨近全日低位收市，埋單唔見兩千點有多，22000關守唔住，點算？
成交大增，250日線失守，梗係得人驚，但最驚慌嘅時候好可能係差唔多見底嘅時候，未夠3個月，恒指已經跌咗10000點，隨時會有個似樣嘅反彈，不過「骨牌效應」呢樣嘢幾時停就好難估，所以環球股市個勢未跌定之前，炒短線要細注同埋保守啲。
花旗股市復市，全球股市食粥食飯都睇佢，如果狂插大跌收市，咁今日都會係血流成河。
恒地C輪9876：恒地（012）昨收64.5元，𠵱家先至下試100日線，已經好過好多股票，昨日以大成交「倒轉錘」收市，可以博反彈，買少少C輪9876。
隻輪昨收46.5仙，槓桿率13.8倍（有效6倍），博正股升上68.5元，9876可以升4成，正股跌穿62.5元止蝕。