名模楊崢除了愛行天橋，還愛攝影和旅遊，她近日到訪柬埔寨，被當地的歷史文化古蹟深深吸引，她笑言古廟的老榕樹猶如哥斯拉的巨爪，十分嚇人。楊崢更於返港前的早上，在吳哥窟看到日出，令她帶着朝氣勃勃的愉快心情踏上歸途。 撰文：比華利
楊崢早前到柬埔寨旅行，5日4夜的行程只能到吳哥窟和暹粒兩個景點，無奈這次時間不夠，未能順便到勝景之一的金邊觀光，算是美中不足。楊崢看梁朝偉在吳哥窟取景的電影《花樣年華》時，已對那個地方留下深刻印象，她說：「原來真係好靚，始終呢個地方有自己嘅歷史背景，每到一處除咗欣賞佢嘅特色建築，又可以體察當地嘅文化。」
導遊細心講故事
慶幸這次有專業導遊帶領遊景點，令行程倍添趣味，楊崢說：「導遊細心講解每個地方背後嘅故事同文化，我哋好似聽歷史古仔咁，聽到津津有味。」
問楊崢此行最喜歡那個景點？她即推介暹粒的TaProhm廟，整間廟宇外都有天然老榕樹盤踞着，她說：「榕樹嘅樹根粗大，好有氣勢，顯示大自然嘅生命力好頑強，見到啲樹根，我即刻諗起哥斯拉，其實都幾嚇人㗎。導遊講古仔時仲話，當地好多間廟宇都俾巨大榕樹嘅樹根掩沒，當地政府為咗保留特色，盡量都唔會鋸走啲樹根，以保持大自然美態。」
楊崢在廟宇接觸到當地的小孩子，大讚他們活潑可愛，還力邀其中一名小女孩合照留念，楊崢說：「小朋友可能比較貧窮，少接觸相機，所以佢哋一見到有遊客影相，就會好雀躍同興奮，我當然好樂意同佢哋合照，況且相中嘅小妹妹都好靚女。」
「好有靈修味道」
一日之計在於晨，楊崢很愛看日出，感覺朝氣勃勃，她說：「睇日出個天要好清，喺柬埔寨嗰幾日，天氣麻麻，臨走嗰朝早，導遊安排咗我哋去吳哥窟博一博，結果去到一個荷花池邊，我哋好幸運真係睇到，個太陽徐徐升起嗰一刻，我哋大家都好感動，晨曦同荷花池構成嘅畫面，好有靈修嘅味道，令我覺得呢啲就係緣份，所以先喺走之前睇到。」所以就算犧牲寶貴的睡眠時間，楊崢也認為非常值得。
話你知：Bayon廟富特色
楊崢大讚柬埔寨的Bayon廟宇值得一去，因為它歷史悠久，建築充滿特色，當中滲透着濃烈的藝術色彩，令她眼界大開，她說：「我好鍾意廟宇裏面嘅一尊佛像，佢有一副慈祥嘅笑臉，睇完畀人好舒服嘅感覺。」
話你知：必備防曬用品
到柬埔寨旅行，楊崢的貼士是必備防曬用品和鞋履要輕便，她說：「因為太陽好猛，好易曬傷皮膚，當地始終比較落後，道路設施冇咁方便，好多小路車輛都唔可以駛入，所以要行去，一定要着一對輕便鞋，咁樣行幾多路都唔怕腳痛。」
